NAGKUROG sa dihang nakadawat og mensahe sa iyang Facebook Messenger si Hannah Lei Pepito, 21, kinsa nakapasar sa Licensure Exam for Teachers (LET) nga gipahigayon niadtong Marso ug nahimutang siya sa Top 4.
Si Pepito usa sa tulo ka mga Sugboanon nga nakasulod sa top 10 sa mao nga pasulit.
Laing Sugbonoan nga ni-top mao si Jade Soronio Tagab, top 3 sa elementary, tinun-an sa University of the Visayas-Cebu City (UV-Cebu City), kinsa adunay rating nga 88 percent.
Top 10 sab sa secondary si Roel Rumarate Yu, tinun-an sa University of San Jose-Recoletos, nga dunay rating nga 90.6 percent.
Asoy ni Pepito nga taga-Tayud, lungsod sa Liloan, Sugbo nga kagahapon sa buntag didto siya sa University of Cebu – Lapu Lapu and Mandaue nga naglinya aron sa pagkuha sa iyang transcript of record nga requirement sa iyang gisudlan pagka-maestra sa usa ka pribadong tunghaan sa Liloan.
Nagkuri-kuri siya sa iyang cellphone samtang nagpaabot ug nakadawat og screenshot photo gikan sa iyang kanhi classmate sa listahan sa Professional Regulation Commission (PRC) sa mga nipasar sa LET.
“Nagkurog kurog ko pagkakita sa akong ngalan... tupad sa number four,” dason ni Pepito sa dihang nahinabi sa Superbalita Cebu.
Unang gihimo ni Hannah mao ang pagtawag sa iyang ginikanan aron sa pagpahibawo dayon dagan sa kapilya sa UCLM aron magpasalamat sa Kahitas-an sa iyang nakab-ot nga kalampusan.
Iyang gitug-an ang iyang sekreto, gawas sa pagtuon, gihimo niyang inadlaw ang iyang pagdu-aw og novena kang Saint Joseph of Cupertino, santos sa mga mokuha og pasulit.
Samtang matag Dominggo mobiyahe siya gikan sa ilang lungod paingon sa Basilica del Sto. Niño aron pagtambong sa santos nga misa. Samtang ang dean sa College of Education sa UCLM, Elna Sabornido nagkanayon nga sa miaging tuig, way taga-UCLM nga nakasud sa Top 10, sukwahi niadtong sukad sa 2012 ngadto sa 2016, dili mangiwit ang ilang tunghaan sa mga top notcher.
Apan pinaagi ni Pepito gibalik niini ang dungog sa UCLM.
Dugang pa ni Sabornido nga niadtong Septiyembre 2017, mokuha unta sa LET si Pepito apan iyang gitambagan nga sa Marso 2017 na siya mopaubos sa pasulit aron makapangandam pag-ayo ilabi na nga iyang nakita ang potensiyal sa maong tinun-an nga makasulod sa Top 10.
Si Pepito mitapos sa iyang kurso sa edukasyon sa UCLM niadtong March 2017, nga di honor student atol sa iyang pag-graduate. Kasamtangan nga nagtudlo sa Academia del Christifidelis, Liloan si Hannah ug mitiwas sa iyang masteral degree sa Cebu Technological University.
Ni-congratulate ang dean of college sa UV-Cebu City nga si Dr. Nerissa Lopez ngadto kang Tagab.
“I want to congratulate Jade for giving the university the honor. Actually Jade is a very shy girl. I am so proud of her. I hope to see her as soon as possible,” sulti ni Lopez sa Superbalita Cebu.
Nipaambit ang dean sa College of Education sa USJR nga si Dr. Jestoni Babia sa iyang pagdayeg kang Yu.
Malaumon si Babia nga mas mousbaw pa si Yu sa iyang napiling field. “I also want to congratulate him for bringing USJR to the next level,” nagkanayon si Babia.
Sigon sa mga dean nga di pa sila kapagawas kon pila ug unsa ang incentive nga madawat sa nag-top nga mga estudyante, apan makigtagbo pa sila sa presidente sa tunghaan aron maistoryahan ang incentive. (FVQ & Kate F. Denolang STC-Intern)