SECTIONS
Tuesday August 21, 2018
SUPERBALITA CEBU

P1.5 billion utangon sa kapitolyo

Tukoron. Gibutang sa Kapitolyo sa usa ka dakong tarpaulin agig pahibawo sa publiko ang desinyo sa 20 ka andanang building nga tukuron niini pinaagi sa pagpangutang sa Development Bank of the Philippines (DBP) og P1.5 billion. Unsaon sa pagbayad niini sa Probinsya? (Alex Badayos)

ANG Kapitolyo ug Development Bank of the Philippines (DBP) nagpinirmahay na sa loan agreement subay sa tinguhang paghulam sa Provincial Government og pundo alang sa katukuran sa bag-ong BAEX building.

Moabot og P1.5 billion ang pundo nga huwaman sa Kapitolyo ug base sa kasabutan, bayran kini sulod sa 10 ka tuig.

Anaa lang sa 2.9% per annum kun kada tuig ang fixed interest rate nga bayran sulod sa 10 ka tuig kun 120 ka buwan.

Sa unang tulo ka tuig kun 36 ka buwan, bayran sa Kapitolyo ang interest rate samtang sa ika-37 nga buwan hangtod sa katapusang buwan, mao na ang principal nga loan kun ang P1.5 billion.

Ang bayad sa loan kuhaon gikan sa kita sa tulo ngadto sa lima ka floors nga paabangan sa Kapitolyo.

Ang ubang pundo nga ibayad kuhaon sa ubang income sa Probinsya.

Matod ni Gobernador Hilario Davide III nga human sa pinirmahay sa loan agreement, isunod ang pagpanday sa ordinansa sa pag-ratify sa loan ingon man ang pag-gahin og supplemental budget alang sa pagsugod na usab sa pagbayad niini.

Human usab niini, diha na mopatawag og bidding ang Provincial Government alang sa kontraktor nga maoy mohimo sa proyekto nga 20-storey nga building, diin usab unya ibutang ang moderno nga Disaster Risk Reducation Management (DRRM) Center sa Probinsiya.

Lakip sa nisaksi sa pagpinirmahay sa loan agreement silang Bokal Miguel Magpale, Provincial Accountant Ramon Dumayac, Provincial Budget Officer Danilo Rodas, Assistant Provincial Treasurer Emmanuel Guial ug uban pa.

Dunay laing pending loan ang Kapitolyo sa Land Bank of the Philippines, nga maoy gigamit sa pagpalit sa nakontrobersiyal nga heavy equipment, nga mobalor og kapin sa P120 milyones.


VIEW COMMENTS