Binghay: Kina-iyang lisod ika-uban

DI kalikayan nga bisag unsa pa nimo ka-maayo o kamang-gitabangon, duna gyoy kontrabida nga motumaw sulod sa imong tunghaan o trabahoan.

Kini siya dali ra nimong mailhan kay kusog man magpakitang gilas kung naay laing mata nga magtan-aw labi na og ang amo mismo o supervisor. Ngilngig sab ni siyang magpa-impress kay murag daghang nahibaw-an ug taas ang kasinatian. Kina-iya ini ang mang-sipsip nga murag linta ug himo/hatod og bahong estorya para pagdaot sa uban sama sa lambay nga kusog mamira paubos.

Iyang panan-aw sa mga tawo nga nag-alirong niya dili kauban kun dili kompetensiya.

Di kini ikahibulong kay komon kini siyang makita bisag asa nga institusyon, trabahoan o tunghaan kay duna gyo’y motumaw nga bida ug kontra-bida

Ang pangutana ikaw ba nakapanamin na sa imong kaugalingon kung asa ug unsa ka nga klase sa paka-mamumuo: bida o kontrabida ba?

Kining mosunod maoy mga kina-iya sa kaubang lisod ika-trabaho:

Kini siya gara ug gustong pirming sikat. Kung dunay report o papeles nga isumitir, bisag di siya nagbuhat, iya kining angkunon aron siya ang makadawat sa pagdayeg. In other words, credit grabber.

Kusog mamamak ug di igbali ini kung dunay matamakan o masamdan nga pagbati basta ang iyang mga pulong ug punto iyang mapadayag. Para niya, siya maoy pinaka-sikat ug importante.

Kusog sab kini siya mamasangil og gamit sa pangalan sa uban. Ang kapait kay kung mapuhalan, di na mo apil sa ubang kalihukan. Kung mapakyas o masipyat sab, kusog kining mamasa ug mamahid sa iyang mga kasaypanan.

Tungod kay taas man ang garbo ug mapahitas-on, di kini mangayo og tabang bisag nagka-dipo-dipo na.

Wa kini pakisama basta makuha lang niya iyang gusto bahala’g maligsan ang uban. Kung magkalisod, iduot ka pa kay di man molaban nimo.

Negatibo ang mga pulong nga kanunay moguwa sa iyang baba kay para niya, siya ray insakto. Di kini mangita og paagi nga masulbad ang problema kay magpunay ra man kini og pamantay sa uban.

Kusog manaway og seloso kini siya sa kalampusan sa uban.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph