SECTIONS
Tuesday August 21, 2018
SUPERBALITA CEBU

Lapulapu, ang misteryusong bayani

“Lapulapu The Conqueror of Magellan,” ang bag-o nga libro sa inilang Cebu historian Dr. Resil B. Mojares.

GAWAS sa iyang kamatayon sa mga kamot ni Ferdinand Magellan atol sa away nila sa Mactan, unsa pay imong nahibaw-an kalabot sa giisip nga labing unang bayani sa nasod nga si Lapulapu? Hangtod karon nagpabiling talinhaga ang nahitabo ni Datu Lapulapu human sa iyang kadaugan batok sa mga Katsila niadtong Abril 27, 1521.

Way ni bisan usa ang nakahibalo kon naunsa siya human sa maong makasaysayanong away.

Kinsa siya?

Misteryuso ang pagkatawo ni Lapulapu: iyang edad, iyang dagway, ug iyang tibuok pagkatawo.

Adunay niingon nga “tiguwang” na si Lapulapu.

Aduna say nihulagway kaniya nga dagko og braso ug bagtak, lapad ang abaga, lisngag ug piyangak ang ilong, balhibuon, dako’g aping, ug square ang apapangig niini.

Ang problema mao nga di konkreto o kompleto ang pagkahulagway sa iyang pamarug ug pagkatawo sa mga sinulat kalabot niya.

‘Oral tradition’

Ang kamatuoran mao nga nabuhi ang pagkatawo ni Lapulapu nunot sa oral tradition kalabot kaniya gawas sa iyang malampuson nga away batok ni Magellan.

“In the European historical record, Lapulapu is invisible. No one of those who were involved in the battle of Mactan and its surrounding events in 1521, and left behind a written record, actually saw him, knew what he looked like, heard him speak, or mentioned that he was present in the battle that made him famous,” introduksyon ni Dr. Resil B. Mojares sa iyang libro nga Lapulapu: The Conqueror of Magellan.

Si Mojares usa ka professor emeritus sa History and the Humanities sa University of San Carlos sa Cebu City.

Ang Lapulapu: The Conqueror of Magellan, usa ka libro nga hinubad sa Ingles gikan sa Sugbuanong nobela ni Vicente Gullas niadtong 1938, ang bugtong libro, bisan sugilambong (fiction), nga naghisgot sa kinabuhi ni LapuLapu.

Sa libro, gisaysay ni Mojares ang tanang mga sinulat kalabot ni Lapulapu gikan sa kasaysayan, kasugiran, ug sikat nga mga katitikan.

Si Dr. Erlinda K. Alburo, kanhi direktor sa Cebuano Studies Center sa University of San Carlos, ang nihubad sa orihinal nga nobela ni Gullas nga Lapulapu: Ang Nakabuntog Kang Magellan.

Gipresentar ni Mojares ang Lapulapu: The Conqueror of Magellan atol sa paglusad niini niadtong Mayo 5 didto sa Cebu City Public Library nga gitambungan sa mga tinun-an, magtutudlo ug mga Sugbuanon sa nagkadaiyang background.


VIEW COMMENTS