SECTIONS
Tuesday August 21, 2018
SUPERBALITA CEBU

Barko mibangga sa wharf

NUNOT sa kusog nga unos nga niigo sa dakbayan sa Lapu-Lapu niadtong Biyernes sa hapon, usa ka barko ang naanod ug nibangga sa Hilton wharf sa Barangay Punta Engaño pasado alas 4:00 sa hapon.

Kini gikompirmar mismo ni Andy Berame, pangulo sa Lapu-Lapu City Disaster Risk Reduction and Management Office (CDRRMO).

Matod niya, niingon ang taga Philippine Coast Guard (PCG) nga gihipos ang angkla sa mga tripolante sa MV Mikari V, ang barge nga gipanag-iya sa Jomalia Shipping sa dihang kini nidunggo sa pantalan sa wa pa nahitabo ang insidente.

Paghapak sa unos, giingong naanod ang maong barko gikan sa gidungguan niini paingon sa kilid nga bahin sa pantalan nga dungguanan sa mga pump boat.

Si Berame niingon nga mga sobra sa 20 metros ang gilagputan sa barko usa kini nibangga ug nisangad sa pantalan.

Wa hinuoy naangol atol sa insidente.

“Di man to mao ang docking area nila sa picture. Docking area tos mga pump boat. Maayo gani, kon dili pa low tide, maigo to nila ang terminal sa Cebu Port Authority. Kon wala pa sila masangad, maigo to nila ang terminal, dako-dako og damage, maayo gani kay nasangad sila,” ni Berame ning mantalaan.

Paambit niya nga nadaro sa barko ang haligi sa pinakatumoy nga covered walk sa pantalan, lakip sa naguba mao ang koral niini.

Dugang ni Berame nga di pa kabanabana ang iyang buhatan sa kon pila ang danyos sa pagkabangga tungod kay ang angayng buhaton sa management sa barko mao man ang pagduso og marine protest sa ngadto sa Maritime Industry Authority (Marina).

Human sa pagduso sa marine protest, didto na matino kon pila ang gibanabana nga danyos sa paril ug haligi nga naguba.

“Wala ra na-affected ang operasyon sa pantalaan. Kon mahawanan na to kay naa may nangabuak nga mga botelya, ma-normal na ang operasyon,” ni Berame kinsa niingon nga normal ra gihapon ang operasyon sa maong pantalaan bisan nakaagi og ginagmayng kahasol.

Atol sa insidente, gisuspenso sa makadiyot ang biyahe sa Hilton Wharf apan gibalik ra gihapon kini sa normal.

“Kon high tide pa to, maigo to ang waiting area, kon wa pa siya masangad. Mas dako og guba-guba,” sumala pa niya.

Gisalikway sab niya ang taho sa ubang netizens nga niingon nga nipasalipod ang maong barko daan sa pantalan sa wa pa ang unos.

“Di na tinuod nga nipasalipod sila kay mabawo man to nga area (kon asa naanod ang barko tungod kay dungguanan kini sa mga bangka),” dugang ni Berame.

Gawas niini, siya nidugang nga hunas niadtong higayona atol sa insidente maong masangad ang barko kon mopasalipod sa mga dungguanan sa mga bangka.

Gisusi pa kon pila ang tino nga danyos sa hitabo sa pagkutlo ning balita sa Superbalita Cebu.


VIEW COMMENTS