CEBU CITY -- Nailhan og maayo si Ireneo Barientos o mas naila sa iyang dagnay nga Rene atol sa iyang pag-angkon sa WBC World Super Featherweight belt kontra sa Amerikanong si Ruben Navarro niadtong Pebrero 15, 1969 didto sa Araneta Coliseum, Cubao.
Nahipatik kini sa kasaysayan sa Cagayan de Oro isip siya ang unang Kagay-anong World Champion sa edad nga 25 anyos.
Wala magdugay ang bakus sa iyang hawak human mapilde sa iyang title defense apil ang return match kang Japanese Yoshiaki Numata sa tuig 1970 ug 1971 agi tanan sa split decision diin didto giaway tanan sa Japan.
Apan, mapasigarbohon gihapon si Barientos kay dili na mawala sa kasaysayan nga sa mahimubo nga panahon naangkon niya ang titulo nga ‘World Champion’.
Wala nagmahay si Barientos nga nahimo niya nga career ang boksing kay nakaplastar siya og luna alang sa iyang pamilya diha sa Barangay Carmen nga adunay loti nga 4,000 square meters ug naa pa laing 300 square meters.
Kataposan niyang away mao niadtong 1978 ug iya dayon gisab-it ang iyang gloves sa pagretiro.
Apan, wala damha nga naningil ang kalibutan sa boksing kaniya human gitawag siya ni Mayor Oscar Moreno aron himuong usa ka consultant sa boxing program sa dakbayan.
Bagohay lang, usa siya sa coaching staff sa Team CdeO boxing team nga nilangkat og unom ka bulawang medalya sa Philippine National Games niadtong Mayo 21-25 didto sa New Cebu Coliseum, Cebu City.
Dili mahimutang si Barientos sa iyang gibati pagtunob sa coliseum kay mismo kanang lugara naa siya’y dili malimtan nga away.
Niagi siya og unom ka away sa karaang Cebu Coliseum ug dili niya malimtan ang iyang kapildehan kang Gabriel “Flash” Elorde sa Pebrero 27, 1965. Sa tanang away niya sa maong Coliseum, mao ra kana iyang pilde.
Dumdum ni Barientos nga nidapig ang Cebuano fans kang Barientos ug mabati niya ang tanan mga pagdapig nga lamang siya sa away kontra kang Elorde.
Durong sukoa sa mga manan-away nga wala gideklarar nga knockdown si Elorde sa 11th round sa ilang 12-rounder. Matod pa sa referee nga na-slide lang daw si Elorde.
Ang pinaka pait nga iyang nabati, gitabangan pa sa referee pagtindog.
“Dili ako mohukom niana kay bias kung ako lang, apan mga fans ug mga Cebuanos nanan-aw ato maoy makahukom atong higayona,” ingon ni Barientos.
Apan, samot ang kasuko sa mga manan-away human gideklarar si Elorde nga daug agi sa unanimous decision.
“Dapig ang mga bisaya kanako ato nga time, apan dawat ko man lugar ang hukom sa mga hurado pero I won a lot of fans tungod ato nga away,” si Barientos nagkanayon.
Busa makatungtong siya balik sa Sugbo labina sa New Cebu Coliseum, mao to nga kasaysayan nga dili niya malimtan.