PAGLIBOT-SUROY ngadto sa maanindot nga talan-awon sa kaulohan ang usa sa regalo ni Misamis Oriental Governor Yevgeny Vincente Emano ngadto sa Top 5 Performing Capitol employees.
Gipasidunggan ang lima ka mga empleyado tungod kay ilang nakuha ang kriterya nga haom mahimong ehemplo ug maayong empleyado sa kapitolyo.
Matud ni Emano nga kaniadtong tuig 2017, napulo ka empleyado ang nakasaksi sa coronation night sa Miss Philippines Earth ug karong tuig lima lamang sila.
"Karon kay lima lamang sila what I told them is to bring their husband and wife nga makasuroy didto sa kaulohan," sigon ni Emano kinsa malaumon nga magpadayon sila sa ilang maayong pagserbisyo sa probinsya.
"I hope that you have good times, I hope that you will be there to enjoy and you will not stop talking to our fellow employees on how to become a model employees especially in serving our people," dugang ni Emano.
Ang mga Top 5 Performing Capitol employees gilangkoban nila ni Antonio B. Quirono gikan sa Misamis Oriental Provincial Hospital sa Claveria; Jener B. Alaba gikan sa Office of Barangay Affairs; Richie Balagot gikan sa Provincial General Services Office; Edgardo Cagalawan gikan sa Provincial Risk Reduction Management Department ug Zutchin Vallecera gikan sa Provincial Assesors Office.
Nasayran nga 23 kini silang gipilian apan sila ang napiling naghupot ug haom sa kriterya nga top performing employee sa kapitolyo ning tuig. (SVB)