USA sa lima ka mga suspek nga mipusil patay sa mayor sa lungsod sa Buenavista, Bohol nailhan na.
Si Chief Supt. Robert Quenery, direktor sa Police Regional Office (PRO) 7, nimando og manhunt batok sa nga mamumuno.
Ang security aide mismo ni Mayor Ronald Lowell Tirol, 37, ang niila sa usa sa mga gunman.
Matod ni Quenery nga niadtong 2014, gisuwayan usab pagpatay si Mayor Tirol sud sa usa ka buwangan sa lungsod sa Clarin apan wala ni maigo.
Giingong namay-ongan sa bodyguard sa mayor ang usa niini nga matod pa mao usab ang gunman niadtong 2014 nga giila sa mga imbestigador nga si Elmer Abanda Melencion alyas Iti Melencion, hingkod ang pangidaron.
Tulo ka mga anggulo ang gisubay karon sa kapulisan: kalambigitan sa politika, negosyo ug sa personal nga atraso nga naglambigit matod sa gugma.
“Well, ang tinitingnan ng ating nga imbestigador ay it could be political and then business rivalry or personal relationship(love affair),” matod ni Quenery.
Lakip sa ilang subayon ang pagkasugarol niini sanglit sa unang suway nga pagpatay sa mayor didto gihapon kini nahitabo sulod sa usa ka buwangan sa lungsod sa Clarin.
Si Sr. Supt. Angel Genorga, hepe sa Bohol Police Provincial Office, nagkanayon nga gawas sa security aide sa mayor adunay daghan ang nakasaksi sa hitabo.
Niadtong 2014, ang suspek nga si Melencion human mailhan nga siya ang suway nga mipatay ni Tirol misibat kini sa Bohol ug nagtago-tago.
Giila kini nga gun-for-hire ug aduna nay warrant sa kasong murder human gilambigit sa mga kaso sa patay sa maong lalawigan.
Gawas kang Melencion padayon nilang giila ang laing upat nga maoy get-away vehicle sa suspek nga nag atang sa gawas sa buwangan.
Una nang nakaangkon ug daghang pinusilan sa lawas ang biktima human pusila sud sa buwangan sa Barangay Asinan, lungsod sa Buenavista alas 3:15 sa hapon.
Gisuwayan kinig dala sa Dagohoy hospital sa lungsod sa Inabanga apan pagka alas 4:30 sa hapon nakabsan kini sa kinabuhi. (AYB)