NAGSUGOD na ang balasahan o pag-ilis sa liderato sa senado. Niadtong nilabay’ng semana, niluwat sa iyang katungdanan isip Senate President si Aquilino “Koko” Pimentel III nga gipulihan ni Majority Floor Leader Tito Sotto. Abli nga gidawat ni Senator Pimentel ang iyang kapalaran nga sa iya pa, subay lamang sa sistemang demokrasya.
Gani siya pa ang nagnominar kang Senator Sotto sa pwesto nga gitawag niyang dangpanan sa mga bag-ong senador nga sama kaniya. Nahimong Senate President si Pimentel sa paglingkod ni President Rody Duterte niadtong 2016. Si Pimentel maoy kasamtangang presidente usab sa Partido Demokratikong Pilipino (PDP)-Laban nga maoy gisakyang politikanhong partido sa iyang pagdagan isip president. Sa pagkatinuod, dugay nang sakop sa PDP-Laban si PRody nga gani si kanhi Senate President Nene Pimentel, amahan sa batan-ong senador, ang nipahural sa iya dinhi sa Davao sa hinapos nga bahin sa 1990’s.
Hinay daw ang liderato sa senado mao nga daghang panahon nga iwit kining mopasibaw sa iyang baruganan sa mga importanteng isyu sa katilingban. Naghinobra sab daw pagka pro-Duterte ang liderato mao nga mora na sila’g stamp pad o kiko-kiko sa Malacanang. Daghang nahurot nga panahon sa imbestigasyon ang senado nga morag way kapadulngan imbis nga mopanday kini’g importanteng balaod aron moarang-arang ang kinabuhi sa yanong lungsuranon ug mopasayon sa pagdagayday sa serbisyong sosyal ngadto kanila. Sama sa senado, anaa say balita nga magbalasa ang kongreso sa dili madugay.Nagkadaghan daw ang wa kaangay sa iyang liderato busa angayan nang ilang ilisdan.
Para kanako, kining tanan mga normal lamang nga panghitabo sa demokratikong sistema sa kagamhanan.
Wa kini kalainan sa gimat-an natong buroka sa pulitika sa nasud. Ang kontra karon, managhigala na ugma.
Ang partidong nilingkod karon, pulihan sa partidong nakadaug ugma. Dili nato malikayan ang susamang kalihukan ilabi na nga taliabot na ang bugnong lugaynon sa nasudnong posisyon.
Buot na usab nga sakniton ang gahum sa kasamtangang administrasyon sa gitawag nila nga “dilawan” o ang Liberal Party ug mga alyado ni kanhi PPinoy. Apan sa laing bahin, nagpursige sab ang partido ug mga alyado ni PRody nga palig-onon ang ilang han-ay pinaagi sa pag-usab sa kasamtangang pultikanhong sistema ngadto sa Pideralismo. Dugay nang panahon nga ginaduso kini apan morag wa pa gayud masabti sa katawhan kung unsa kining sistemaha?
Hangtod karon wa pay hiniusang bersyon sa pagpasabot sa Pideralismo ug ang epekto niini sa yanong katawhan.
Ang ikaduhang lakang sa administrasyon mao ang pagkab-ot sa tiunay nga kalinaw sa Mindanao ug sa nasud.
Gihimo nang priority bill ang Bangsamoro Basic Law busa makaingon ta nga molusot na kining balaura nga motubag kuno sa “historical injustice” sa mga kaigsuonan natong Muslim sa Mindanao.
Nunot niini mao ang pag-abli pag-usab sa hinabing pangkalinaw tali sa Communist Party of the Philippines-New People’s Army.
Kadaghan na kining naoktaba apan gihatagan pag-katapusang lugway sa pangulo nga matapos sulod sa duha ka bulan. Nipahayag usab si CPP Founder Jose Maria Sison nga mopauli sa Pilipinas aron madayon kini. Makuha kaha ni PRody ang Nobel Peace Prize kung madayon kining tanan? Hinaut pa unta.