HUMAN ang lima ka intensity workouts, ang mga midaug sa Tempra Battle of the Strongest national crossfit competition gideklara niadtong Sabado sa gabii didto sa Matina Town Square (MTS) Activity Center.
Sila Rocky Dorjsembe, Kristen Lim, Wilmar Tumbali, Whenzy Rio, Grech Go ug Chali Bas ang mikampeyon sa ilang matag dibisyon human mihimo sa barbell complex, handstand walk course, stamina-tester, short workout sprint, ug ang kombinasyon sa muscle ups ug thrusters.
Si Dorjsembe sa Cebu City ang pinakakusgan sa men's RX division batok Justin Hernandez sa Manila ug Nicho Mauricio sa Davao City.
Samtang, si Kristen Lim sa Manila mihimo og rekord sa kompetisyon human gipalukapa si women's RX division defending champion Isabell Wolfe ug Wan Jia Li sa Pampanga City.
Sa bahin ni Tumbali, mikampeyon sa men's scaled division kontra Christian Cabangbang sa Iloilo City ug Dabawenyo Joseph Mangulabnan.
Sa babaye, si Whenzy Rio sa Iloilo City ang miuli sa korona human gipangtagak sila Marga Ortiz sa Manila ug Rikki Saul sa Pampanga City.
Samtang si Grech Go sa Manila, ang nanguna sa men's masters division batok langyaw Ashton McIntyre sa Thailand ug kauban Manilenyo Anton Sietereales.
Si Chali Bas sa Hongkong ang nakoronahan sa women's masters division kontra Chamel Melo sa Manila ug Jane Garner sa Davao City.
Ang kalihukan gipresenta sa Visit Davao Summer Festival kauban ang Crossfit Madayaw.
Kini gisuportahan sa Department of Tourism Davao Region, Air Asia, Globe, Cebu Pacific, Tanduay, Bonamine, Flanax, WODX ug lokal gobyerno sa Davao. ABM