AMBOT kon mapugngan pa ba kining mga “hinanggaw ug binuang” nga mga impormasiyon gipakatap sa social media sama sa Facebook.
Alang niadtong dunay Facebook account, nasayod mo nga matag karon og unya mogawas sa inyong “wall” kining dapit sa imong “page” diin makita ang mga impormasiyon nga gi-post sa imong mga followers, fans, friends. Mogawas diha ang ubang impormasiyon sama sa news feeds ug uban pang mga kalihukan sa atong palibot.
Dunay katuohan nga impormasiyon kabahin sa health, politics ug kalihukan sa komunidad. Apan, lisod sutaon kon balido ba ang impormasiyon o peke ba, kana magdependi kanunay sa dugang pagdukiduki.
Ang peligro ani kay kon dunay impormasiyon nga pabor nato dali kaayo ta nga mo-share aron mabasa usab sa atong mga friends ug followers.
Karong panahona, daghang migamit niining plataporma sa Facebook pagdaot sa ilang isig-ka-tawo. Kon hisgutan nato ang politika, nagbaha diha ang daghang “pagpangdaot” nga impormasiyon.
Ang nakaapan niini kay kon konbensido ta sa maong impormasiyon tuohan dayon nato bisan sa kakuwang og taphaw sa detalyi. Unya, mausab na dayon atong pagtagad o pagtuo sa tawo nga maoy sentro sa impormasiyon.
Kinsa man karon ang angay basolon kon lahi na atong pagtan-aw sa maong tawo. Kita ba mismo o ang nag-share sa hiwi nga impormasiyon?
Ehemplo lang, gipakatap kining advertisement sa Facebook nga kuno ang pag-inom og coffee, beer, bino makaayo sa panglawas sa tawo. Unya duna say laing impormasiyon nga nag-discourage gyud nato sa pag-inom niining matang sa ilimnon kay seguradong makadaot kini sa lawas.
Kon ikaw nga tigamit og kape, moinom og alak ug beer, siyempre pabor gyud ka sa maong advertisement. Unya, dasig kaayo ka nga mo-share sa maong impormasiyon, ug gani, mohatag ka pa og positibo nga comment.
Ang wa mahibaw-i sa kadaghanan mao nga kining manufacturer og mga produkto kanunay na sila nagkuha og mga blogger ug magsusulat nga moendosar sa ilang produkto bisan kon kini makadaot ipresentar nila sa publiko nga kini makapahimsog sa lawas, kana tungod lamang sa ilang interest sa negosyo.
Kining sitwasiyonan nahitabo usab kini sa atong espirituhanon nga pangalagad, sama pananglit niining pagtuo nga kon ang tawo mamatay modiretso na dayon sa langit o purgatory, o kon way suwerti didto na sa imperno.
Kon tuohan nato kini nga way pagsusi sa Kasulatan, nakatuo gyud kita.
Apan, tataw kaayo sa pulong sa Ginoo nga pagamukman ang tawo segun sa iyang pagkinabuhi dinhi sa kalibutan. Ang kataposang paghukom mahitabo sa ika-duhang pag-anhi ni Hesu-Kristo.
Mao bitaw nga dunay second coming kay mao kana ang panahon nga tigumon sa Dios ang mga matarong aron gantihan og kinabuhing walay katapusan didto sa langit unya kadtong mga daotan hukman ngadto sa kalaglagan.
Nahinumdom ba mo sa kaagi ni Lazarus. Human siya gibanhaw ni Hesus, gipangutana ba siya “kumusta ang langit.” Wala! Kay ang tawo kon mamatay, magpabilin kana dinhi sa kalibutan maghulat sa paghukom.
Kon didto pa modiretso sa langit sa Lazarus dili kaha siya moprotesta ni Hesus. “Hesus nganong gibalik mo ako dinhi sa kalibutan nga maayo naman unta akong kahimtang didto sa langit.”
Akong sister-in-law nga si Cristina Odal Todino mitaliwan na ug gilubong niadtong Martes, May 29. Sama sa ubang mga tawo nga mipahulay na, magpaabot na to siya sa pagbalik sa Ginoo. Ang pagbalik sa Ginoo maoy tiunod nga balita, dili peke, apan wa ni siya hatagi og gibug-aton sa kadaghanan bisan niadtong nagpatuo nga Kristohanon kay imbes mangandam pagsugat sa pagbalik, nagpatuyang pa gihapon sila sa pagpakasala.