NAGMALAMPUSON ang Opol Dolphins pag-abli sa ilang unang dula human gipilde nila ang Gitagum, 110-107, sa overtime atol sa 2018 Kuyamis sportsfest Governor Yevgeny “Bambi” Emano Cup 25-under basketball event niadtong Sabado sa Poblacion, Alubijid.
Nitala si Ren Cainoy og 20 puntos aron mangulo sa kadaogan sa Dolphins, samtang nihatag sab iyang kauban nga si Tony Abesamis og 12.
Apan, ang Gitagum ang gadiktar sa tanan upat ka quarters ug nakainat pa sa ilang kinataas nga labaw nga 12 puntos.
Nangipis ang labaw human mibida sila Cainoy ug Abesamis agi pagpamomba nila og tres sa kataposang fourth quarter.
Natabla pa ang dula ngadto sa 102-tanan sa himatyanon nga segundos, apan naay tsansa ang Gitagum masilyo ang dula agi sa charity shots.
Nakakuha og foul ang Gitagum sa kataposang 1.4 segundos sa regulasyon ug naa ang Opol sa penalty.
Sa duha, walay maskin usa ang nisulod hinungdan napugos ngadto sa overtime.
Namugnaw ang opensiba sa Gitagum sa extension ug natugtan nila ang Dolphins moinat og 8-5 run paingon sa kadaogan.
Nipupo sab og dako si Archie Manosa, kinsa sab ang saligandong pointguard sa Xavier University Crusaders, og 30 puntos sa kapildehan sa Gitagum.
Sa pikas bahin, gidaug sab sa host Alubijid ang ilang unang dula human giparot nila ang visiting Naawan, 64-45, alang sa under-18 boys division.