Task Force nga mo-imbestigar sa kamatayon ni Tirol giporma na

MIUMOL na ang Police Regional Office (PRO) 7 og Special Investigation Task Group nga maoy gitahasan nga mohimog imbestigasyon sa pagpusil-patay ni Buenavista Bohol Mayor Ronald Lowell Tirol niadtong Domingo sa hapon.

Bisan pa man nga napasaka na ang kasong murder batok ni Elmer Melencion alyas Iti Melencion ug laing kauban niini, sa gihapon miporma ang PRO 7 og SITG nga maoy mo imbestigar sa maong hitabo.

Gipasabot ni Sr. Supt. Dennis Agustin Deputy Regional Director for Operation sa PRO 7 nga samtang wala pa madakpi ang mga suspetsado angayan nga adunay motutok niini nga unit alang sa dinalian nga pagsulbad sa maong krimen.

Ang naglangkod sa SITG mao ang Bohol Provincial Police Office nga pangulohan sa Provincial Director niini inabagan sa Buenavista Police Station, PNP Crime laboratory, Criminal Investigation and Detection Group 7.

“Ngayon identified naman yung kaso may option tayong i-create or hindi, pero sa ngayon nag create parin kami dahil may intelligence follow up tayo, ang commander dyan ay ang PD ng Bohol at ako ang supervisor,” matod ni Sr. Supt. Agustin.

Dugang ni Col. Agustin nga nalakip sa listahan sa Bohol PPO isip most wanted person si Melencion human siya ang gitudlo nga suway nga mipatay kang Mayor Tirol niadtong 2014 sud sa usa ka buwangan sa lungsod sa Clarin ug aduna usab siyay pending mga kasong murder sa lalawigan sa Bohol.

Tungod niini mahimong mosaka pa ang pagkahimong wanted person ni Melencion human niya mapatay si Mayor Tirol diin tanang unit na sa kapulisan sa PRO7 ang mamahimong mangita kaniya buhi man o patay.

Ang Director sa PRO-7 Chief Supt. Robert Quenery mimando karon sa kapulisan sa lalawigan sa Bohol nga palapdan pa ang ilang manhunt operation sa mga suspetsado.

Adunay nakahatag og impormasyon sa kapulisan nga nasigpatan ang grupo ni Melencion sa lungsod sa Danao-Bohol ug mga silingan nga lungsod sa Buenavista nga mga armado. (AYB)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph