USA ka 14-anyos nga dalagita naangol human dunggaba ang tiyan sa usa ka sakop sa ilang karibal nga gang sa Humay-Humay Road sa Lapu-Lapu City niadtong Lunes sa gabii.
Ang imbestigasyon sa kapulisan nagpakita nga ang biktima naglakaw uban sa iyang mga kauban sa gang sa wa pa mahitabo ang pagpangatake mga alas otso sa gabii.
Ang suliran sa mga gang nga mas naila nga “fam” maoy nag-unang problema karon sa pipila ka mga barangay sa dakbayan sa Lapu-Lapu.
Ang insidente nahitabo wa pay 24 oras human ang 16-anyos nga lalake gipusil sa ilang karibal nga gang sa Barangay Poblacion, Minglanilla niadtong Dominggo sa gabii.
Si Cebu Provincial Police Office Director Manuel Abrugena nimando sa lower units sa paghingusog sa ilang pagpatrolya aron masanta ang mga panagsangka sa mga gang.
Sa Minglanilla, ang biktima naglingkod kauban ang laing menor dihang tulo ka mga sakop sa gang nga nagpanuigon og 16-17 anyos niduol kaniya.
Ang biktima naigo makaduha sa walang bahin sa iyang liog ug dunggan.
Dali siyang gidala sa ospital aron tambalan.
Si Aburegena niingon nga iyang gimandoan si Minglanilla Police Chief Verniño Noserale sa pagsusi sa mga dapit nga kanunay tapukan sa mga gang member.
Si Noserale niila sa plaza sa lungsod ug sementeryo sa Barangay Poblacion Ward III isip komon nga abutanan sa batan-on nga gangsters.
Nakigsulti na siya sa mga barangay kapitan ug fraternity nga motabang sila sa pagpatunhay sa kahusay ug kalinaw sa lungsod. (KAL)