NANGHAWOD ang usa ka traffic enforcer ug usa ka titser sa Mt. Hibok-Hibok Triathlon 2018 series niadtong Domingo sa Yumbing, Mambajao, Camiguin Province.
Gidominar nila John Rey “Tutax” Tumanda ug Jenefer Paloma, mga lumad ug lumolupyo sa Cagayan de Oro, ang ilang kaatbang sa age group category sa usa ka adlaw nga lumba.
Nikampyon si Tumanda, pambato sa Tri-SND Baracuda ug residente sa Barangay 38, human kini milangkat sa first place sa 24-29 male age group.
Nilanding sab si Tumanda, kinsa usa ka enforcer sa Roads and Traffic Administration sa dakbayan, sa ika-upat nga pwesto sa over-all.
Dako ang kalipay ni Tumanda human nga nagsunod kini sa iyang kababayan nga si Banjo Norte kinsa 3rd place sa maong kompetesyon.
“Nagpasalamat ko sa akong mga sponsors nga sila Mayor Uloy Dimaporo and family, Sami Dee ug Paul Jumamil for his Darna coaching,” ingon ni Tumanda.
Sa pikas bahin, first placer ang usa ka magtutudlo nga si Paloma, kinsa usa ka substitute teacher sa Misamis Oriental General Comprehensive High School o MOGCHS, sa female 24-29 age group.
Gipasalamatan sab niya ang padayon nga suporta sa iyang sponsor nga si Barangay 21 chairwoman Gilda Go.
Tanan triathletes sa Mt. Hibok-Hibok series molangoy og 1.5 km nga cross channel sa Camiguin mainland, mobisiklita sa 64 km sa isla ug modagan og 10 km.