GIPANG-IBOT sa mga sakop sa City Mobile Force Command (CMFC) inabagan sa Philippine Drug Enforcement Agency 7 ug Naval Forces Central ang 1,080 ka punoan sa marijuana sa hilit nga dapit sa sitio Hagimit, Barangay Adlaon sa bukirang dapit sa syudad sa Sugbo.
Matod ni Supt. Timmar Alam, hepe sa CMFC, nga nagpahigayon ang iyang mga ginsakpan og minor internal security operation ubos sa “Oplan Kinetec” ilang nasigpatan ang mga tinanom nga color green sa ubos nga bahin sa bukid.
Sa ilang pagsusi dako nalang ang ilang kakurat nga mga marijuana ang mga mitubo nga tanom nga hapit na ma harvest.
Tungod niini, dali sila nga nanawag sa mga sakop sa PDEA-7 aron masugdan ang pagpang ibot sa mga tinanom nga marijuana nga ilang gibana-bana nga mobalor ang tanan ug P432,000.
Walay nasikop nga tawo nga nagtanom sa ilegal nga drugas busa walay mapasakaan nga kaso sanglit ang luna nga gitamnan niini iya sa gobyerno kun timberland.
“Ang atong tropa nag-conduct sila og minor internal security operation sa bukid, didto sila sa taas sa buntod nakit-an na nila sa ubos, kay kung didto man gud ka sa taas murag naa siyay hawan sa tunga nya green kaayo ba murag nindot kaayo pagka hinapay nya napalibotan sa kalibutan mao to nagduda sila nga marijuana plantation,” matod ni Supt. Timmar Alam.
Makaduha na ka higayon nga adunay nasakmit ang mga police nga nagpahigayon ug patrol operation sa bukid sa Adlaon diin kasagaran naa sa Barangay Tagbao.
Nabantayan hinuon ni Alam nga migamay na ang gidaghanon sa mga punoan sa marijuana kung itandi sa ilang mga nakuha sa mga nanglabay nga mga buwan.
Aduna nay gi sugo nga asset ang kapulisan sa siyudad sa Sugbo sa pagpaniid kung kinsa kining mga tawo nga maoy mananom ug marijuana sa bukid aron mao na usab ang ilang sunod nga panid-an panahon sa ilang pagpananom.
Nakahukom ang mga sakop sa CMFC ug PDEA-7 nga didto nalang dauban ang mga naibot nga punoan sa marijuana tungod sa kalayo niini ug nagdala na lang sila og lima ka stalks isip sample ang PDEA 7 alang sa analysis sa laboratoryo. (AYB)