DUL-AN sa 150 ka mga residente ilawom sa unang Mandaue-Mactan Bridge, Barangay Looc, dakbayan sa Mandaue ang nihimo og silent protest atubangan sa city hall tungod sa kahadlok nga sugdan na sila og demolis karong Sabado.
Bisan ang mga bata’ng residente, way kukahadlok nga nibabag sa planong demolisyon og niisa og placards agi’g pagsupak sa maong tinugha.
Usa na niini, ang mag-grade 9 nga tinun-an nga si Jasmine Hazel Añoza naghilak. Nahadlok siya nga maapektuhan ang iyang pagtuon nunot sa demolisyon, ilang panimalay naa ilawom sa unang taytayan.
Nakapangutana sab siya kon adunay ba silay tarong nga mabalhinan kon maguba gyud ang ilang balay.
Laing mga residente nga gikatakdang maapektuhan anaa nagpuyo sa Bantayan sa Hari nga istruktura sa maong barangay.
Nasuta sa Superbalita Cebu nga adunay mga 300 ka pamilya ang maapektuhan sa demolisyon diin ang 100 kanila i-relocate sa 6.5 ektarya nga site sa Brgy. Paknaan.
Laing 200 ka pamilya pangitaan pa og relokasyon site sa kagamhanan. (JPP)