USA ka Japanese national nga gituohang sakop sa Yakuza gang nasikop sa mga sakop sa Philippine Drug Enforcement Agency (PDEA) 7 human nakuhaan og binultong shabu ug mga gamit sa drugas niadtong gabii sa Mayo 29 sulod sa usa ka hotel sa Barangay Sta. Cruz, dakbayan sa Sugbo.
Si Atsushi Tozawa, 39, gipusasan human nakuhaan og usa ka bulto nga shabu, upat ka syringes, tinfoil, improvised tooter, lighter, cards sama sa ATM ug uban pa.
Ang mga ahente sa PDEA7 nakadawat og taho gikan mismo sa mga tagdumala sa hotel human nagduda sila sa lihok sa Hapon tungod sa daghang bisita nga magpulipuli sa pagsulod sa iyang lawak gikan sa Barangay Calamba ug taga Pasil, siyudad sa Sugbo.
Samtang, tagsa ra sa kini magpalimpiyo sa lawak nga giokupar.
Usa ka higayon nga nalimpiyuhan nakakita ang mga naglimpiyo sa mga gamit sa drugas.
Nunot niini gi-report sa PDEA-7 hinungdan nga naaktuhan nga naghupot kini sa drugas ug mga gamit para sa drugas sa security guards ug mga ahente sa PDEA7 nga nagpakaron-ingnon nga sila ang housekeepers.
Ang Hapon usa ka bulan ug 11 ka adlaw na nga nag-estar sa hotel.
Ang lawas niini puno sa tattoo nga dragon samtang ang wala nga kumingking naputol.
Nagtuo ang mga ahente sa PDEA 7 nga posibling sakop kini sa Yakuza gang.
Ang suspek nga nahinabi sa Superbalita niangkon nga tiggamitan siyag drugas.
Nabilanggo sab siya didto sa ilang nasud tungod gihapon sa pagpamaligyag drugas.
Wala na siya mobalik didto sa ilang lugar hinungdan nga dinhi siya sa Pilinas nagtagotago sulod sa tulo ka tuig.
Wala na siya motubag kabahin sa isyu kun sakop ba siya sa Yakuza, apan gipadayag niini nga dili na siya gusto pa nga mobalik sa ilang nasud.
Sa laing bahin, usa ka giingong hitman sa Tau Gamma Phi nasikop ug nakuhaag armas ug shabu uban sa laing unom ka mga tawo atol sa saturation buy-bust operation sa miaging buntag sa Sitio Galaxy, Barangay Tangke, dakbayan sa Talisay.
Si Jason Padillo, hingkod ang panuigon, giilang kaintapan nga “hitman sa Tau Gamma” sumala sa kapulisan.
Nangulo sa opersyon mao si Chief Insp. Christopher Rey Natnat, hepe sa Provincial Intellience Bureau sa Cebu Provincial Police Office (PIB-CPPO) uban sa lain team sa kapulisan.
Si Padillo nakuhaag drugas ug cal. 45 nga armas uban sa 16 ka buhing bala.
Lakip sa gipangpusosan sila si Russel Cabaltera Bartolome, Christopher Obrero Relampagos, Jessica Garcia Abesia, Angel Rose Husalan Beter, Rinie Labajo Gavas, ug harold Harold Labajo Padillo, pulos hamtong na sa edad.
Si Sr. insp. Nazarino Emia, deputy chief sa PIB, nagkanayon nga subject sa buy-bust operation ug saturation drive sila si Padillo ug ang ig-agaw nga si Renie Gavas kinsa maoy nagpadagan sa drug den.
Nakuha sa kapulisan ang duha ka gagmayng putos, P500 buy bust money, 4 ka dagkong putos o bulto sa shabu.
Laing 5 ka putos nga shabu ang tanan motimbang sa 20.28 gramog og gibanabanang mobalor sa P239 mil k sa DDB value.
Si Emia niingon nga ang manag-agaw nagkombuya sa pagpadagan sa ilang negosyo sa drugas.
Si Padillo gikaintapan kay daghan na kining krimen nga nahimo diin nalambigit sa mga pagpanusil sa Talisay ug Metro Cebu.