DIGOS CITY -- Nagbahad ang Commission on Election (Comelec) sa dakbyan nga tinud-on nila paglutos ang mga kandidato sa Barangay ug Sangguniang Kabataan (SK) nga wa motuman sa Omnibus Election Code.
Sumala ni Abogada Aimee Ferolino-Ampoloquio, election officer, aduna gyuy mga kandidatong wa motuman sa gilatid sa balaod.
“I would say thanks for those who religiously follow the Comelec guidelines during the May 14 SK and barangay elections. And for those who dared to violate the rules, see you in court,” pintok nga pahayag niini.
Gipaniguro ni Ampoloquio sa publiko nga ilang kasohan ang mga kandidato nga wa motuman sa balaod sanglit nakakuha sila og mga ebidensya dihang gipahigayon ang “operation baklas” sa mga campaign posters o election propaganda.
Gipahigayon sa Comelec ang pagbaklas sa mga posters human misupak ang mga kandidato sa balaod kuyog ang City Engineer's Office, Department of Public Works and Highways, City Environment and Natural Resources Office ug kapulisan.
Matud ni Ampoloquio nga anaa na sa ilang buhatan ang mga nabaklas nga campaign posters ug mahimo kining gamiton nga mga ebidensya batok sa mga malapasong kandidato.
Nagbahad sab ang Comelec nga tinud-on nila ang paggukod sa mga midaug ug napilding kandidato nga di mosang-at sa ilang Statement of Contributions and Expenditures (Soce) inig human sa gitakdang deadline sa Hunyo 13.
Subay sa datos sa Comelec, adunay 105 ka mga kandidato ang mag-atubang og perpetual disqualifications nga mohupot og opisina sa gobyerno.
Sa milabay nga 2016 elections, mokabat sa 3,937 ka mga kandidato ang wa mo-submitar sa ilang Soce.
Ang Omnibus election code nagdeklara nga ang usa ka kandidato nga di mosang-at og Soce sud sa duha ka higayon ang mawad-an sa iyang katungod nga mo-serbisyo sa gobyerno.
Si Ampoloquio midason nga ila ng giandam ang mga dokumento ug paghimo og lakang niini. (Orlando B. Dinoy)