KADUHA gyud ko nataymingan og ulan sa duha ka managlahing lugar karong semanaha. Morag sa di madugay magsugod na ang ting-ulan.
Maayo na lang kay kon manamilit na man gani ang ting-init, nakahirit pa gyud mi sa akong mga klasmet kanhi sa high school sa pagpahimulos sa kabugnaw sa tubig sa swimming pool sa usa ka mountain resort sa midwest Cebu.
* * *
Ubay-ubay ang mga proyekto ni Anne Curtis samtang nagpadayon ang tuig 2018. Samtang duna siyay gisyut nga pelikulang kasamtangang giulohan og Aurora, duna sab siyay gumagawas nga BuyBust nga usa ka pelikulang aksyon ug nga ipasalida gawas sa nasud.
Karong semanaha, gipasalida usab ang laing proyekto ni Anne kauban si Dingdong Dantes nga nag-ulohan Sid and Aya: Not A Love Story.
Daghan ang naintriga sa linya nga ‘not a love story’ kay sa trailer, kadaghan kuno gilitok sa duha ang linyang ‘I love you’ ug gani may esena pa nga nagkauban sila sa kama. Unya nganong di man love story?
Aw, mao nay atong usisahon inig tan-aw nato sa pelikula.
* * *
Bisan nag-abli og skin care clinic sa uptown Cebu si Nonoy Zuñiga ug iyang kasosyo, wa talikdi sa doctor of medicine ang iyang hilig sa pagkanta. Karong bag-o nipagawas kinig digital single diin nagduweto sila si Jolianne Salvado sa kantang Pero Atik Ra.
Gawas kang Nonoy nga taga Manila pero nag-isip nga second home na niya ang Cebu, pulos Cebuano ang nagmugna sa Pero Atik Ra. Gi-areglo ni Nendel Endrina ug Zebedee Zuñiga ug ang video gisyut ni Cris Etorma.Unang nakita si Jolianne sa The Voice Kids 2015 ug sukad niadto nakauban niya sa tablado sila si Arnel Pineda, Jed Madela, Darren Espanto, Vice Ganda, Morisette Jona, Rey Valera, Marco Sison ug Hadji Alejandro ug international artists sama sa Air Supply ug si Stephen Bishop.
Nakadani sa mga mahiligon sa musika ang solo version sa Pero Atik Ra pila ka tuig ang nilabay pero malaumon si Nonoy ug Julianne nga magustohan usab ang ilang duweto bisan gawas sa Cebu.
* * *
Nalingaw ko sa tinubagay sa beteranong direktor nga si Mike de Leon ug sa iyang artista sa Citizen Jake, ang journalist nga si Atom Araullo. Nangandoy na ko daan nga makakita ning pelikulaha tungod kay belib ko aning direk Mike nga dugay na kaayong wala mohimog pelikula.
Gusto sab kong makakita kon unsa ang inartehan ni Atom. Wala kaayo nako masubay unsay sinugdanan sa ilang away pero nalingaw ra ko sa ilang tinubagay sa social media.
Mao ra tingali ni away nga di bakya kon di sosyal ang dating. Anà!