HAPIT giharus sa Corpus Christi School ang tanan divisions sa 1st Cagayan de Oro Varsity Coaches Association League niadtong Miyerkules sa Xavier University High School covered courts, Pueblo township.
Nanghawod ang Corpus sa passarelle, small baskeeters of the Philippines ug ladies divisions human gipilde nila ang XU teams sa finals.
Giparot sa Corpus jr. Knights ni coach Carlo Dagalea ang XUHS jr. Crusaders, 57-50, sa passarelle division, samtang gipukan sa baby Knights ang baby Crusaders, 46-35, sa SBP division.
Gilubong sab sa lady Knights ni coach Catrina Pong-Biongcog ang lady Crusaders, 49-10, sa ladies division.
“In fairness sa lady Crusaders, bag-o lang gyud sila naporma busa nidaug kami sa experience,” ingon ni Biongcog.
Apan wala tugoti sa St. Mary’s School ni coach Rene Ilogon nga malaras sa Corpus ang tanan division.
Kini human nagmalampuson ang St. Mary’s Fiat agi sa 60-57 batok sa Corpus Knights sa under-17 boys.
Kontrolado kaayo sa Knights ang dula ug nibinat pa sa ilang kinataas nga labaw nga 12 puntos.
Apan nahinay-hinayan kini pagputol sa St. Mary’s sa kataposang fourth quarter hangtod hingpit naka-una og usa ka punto nga labaw sa iskor 58-57 sa sa pipila ka segundos.
Nasilyo sa Fiat ang kadaogan human ma-intercept ni Tyler Lim ang fastbreak pass sa Corpus ug gipasa ngadto kang Airmeg Mesa ug gisolo paingon sa ring.
Namugna ang liga tungod sa kolaborasyon sa Xavier, Corpus, St. Mary’s ug Cagayan de Oro National High School.
Sila ra sab nga mga eskwelahan nga lakip sa maong kompetisyon ug buot nila nga abli na kini sa tanan sunod summer.
“Na-initiate namo kay walay nag-sponsor og summer league nga school-based, busa nakahuna-huna kami para dili maputol among programa sa eskwelahan,” ingon ni Dagalea.