NAGPADAYON ang pagpanangtang sa Task Force Hapsay Kable sa mga spaghetti wires nga nagbitay-bitay sa mga poste sa nagkadaiyang dapit sa dakbayan sa Cagayan de Oro.
Gibutyag ni Kagawad Teudolfo Lao Jr. nga padayon ang ilang gihimong pagpanangtang sa mga gubot nga mga wires aron nga mamahimong hapsay ang dakbayan ug hapit na mahuman ang sa dalan sa Osmeña.
“Mag-evaluation na sab mi, komusta ,sa asa na ang dagan asa sunod nga project, approved naman atong supplemental so naa naman didto naka lakip ang atong Hapsay Kable nga 3.9 million nga budget so continue na ni siya nga program,” pahayag ni Lao.
Mapasalamaton usab si Lao sa mga stakeholders sa ilang agresibo nga pagtabang.
Ang Task Force Hapsay Kable magdawatan na usab sa ilang honorarium para sa ilang pagkaon inay nga itunol kini nila human sa insidente nga usahay malimtan sila pagpadala.
Temporaryo unang gisirad-an ang parking lot sa Cogon area sa Osmeña extension sanglit nagpadayon ang pagpanangtang sa mga wires.
Nasayran nga gimugna ang Task Force Hapsay Kable niadtong milabay nga bulan human nga gipirmahan ang memorandum of understanding sa buhatan sa mayor ug nagpahigayon usab og pagpirma sa dedication wall isip pagpakita sa dakong suporta sa maong programa.
Ang maong kalihukan gipangulohan sa City Government sa Cagayan de Oro inubanan sa KBP, Cepalco, Cocpo, Misortel, Smart, Moresco-1, PLDT, Cagayan de Oro, ICT Business Council, Jade Cable System Inc., PIA, Globe, Parasat, Philippine Institute of Civil Engineers, Institute of Electronic Engineers of the Philippines, National Telecommunication Commission ug uban pa.