Albor: Kadaogan daghan og amahan

PAGLANSAR og presidente ni Rodrigo Duterte gipasakay siya sa PDP-Laban nga gipangulohan sa mga Pimentel. Kini tungod kay si Duterte ug Pimentel susama nga nagtinguha og federal nga sistema sa gobyerno. Nagsuporta kaniya ang MRRD, PRRD, DDS, RDS, FABP ug mga yano nga lungsoranon. Apan pagdaog ni Duterte daghang mitumaw nga mga grupo nga nangangkon nga nakatampo sa kadaugan. Haom sa sanglitanan nga ang kadaogan daghan og amahan ug ang kapildihan nahisamag ilong-tuwapos gumikan kay walay mahigugma sa nangapilde. Nanggawas ang grupo nga polos nangangkon nga dunay panalangin gikan sa Malacañang. Sama sa Emilio Aguinaldo Organization nga gidumala ni Jay Roa, Revolutionary Govt. Movement-Manila ni Vivian Velez ug PRRD Peoples Congress nga gidumala ni Atty. Matias Roa nga nagpatugbaw sa revolutionary govt. nunot sa pagpangandam sa pagpanudlo og mga mayor kansang Visayas coordinator mao si Alfredo Nastor. Ang Federal Advocates for Better Phil. maoy gigakos sa PDP-Laban. Ang PRRD-DDS sa linudhan ni Duterte nga si Gemma de Asis dinhi sa Sugbo misuporta sa People’s Initiative on Federalism (PIF) nga gitukod sa manghod ni Pres. Duterte nga si Don Duterte kansang Visayas coordinator mao si Dr. Julito Roco. Lain sab ang naglihok nga Cebu Mayor’s Federalism nga maoy nangulo si Sec. Adelino Sitoy. Kanhi nagpasilong sa LP mipalihok sa Cebuano Movement for Federalism (Cemfed) pinaguloahn nila ni Tuburan Mayor Aljun Diamante ug Cordova Mayor Therese Sitoy-Cho diin nangipon na pinaagi sa pagpanumpa ang halos tanang opisyal sa mga distrito sa lalawigan sa Sugbo. Sa siyudad mitumaw ang paksyon tali sa grupo nila ni Lorna Roa-Bacalla ug Vice Mayor Edgar Labella.

Sanglit si Duterte sinagop lamang sa PDP-Laban dunay lakang nga magtukod og iyang partido. Dunay naglihok nga Kilusang Pagbabago (KP), Tapang at Malasakit (TM) ug Peoples Initiative Federal (PIF). Si Davao Mayor Sara Duterte nagtukod og Hugpong Ng Pagbabago (HNP). Gikatakda nga ilusad ang partido ni Duterte sa sunod tuig maong dunay nangagpas nga walay bendisyon sa presidente kadtong mass oathtaking sa PDP-Laban. Gani sa billboard sa Bucor nahisulat ang Go-Bato nga dunay logo sa HNP political party nga gimontar sa mga tigpaluyo sa Davao. Daan nang gihulagway ni Duterte nga si Bong Go maoy iyang favorite senator. Samtang mga supporters ni Duterte sa Japan nag-rally nga nag-awhag ni Go sa pagdagan og senador sa 2019. Ang pagkatangtang ni Senate Pres. Koko Pimentel maoy timailhan nga dili na mopasilong si Duterte sa PDP-Laban kondili adto na sa bag-ong partido. Kinsa kahay mga kandidato nga suportahan ni Duterte sa eleksyon sunod tuig nga polos naman mipapigagd sa iyang administrasyon ang mga alibangbang o puwag sampot sa politika.

(csa_1156@yahoo.com /0916-734-5737)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph