SA naghinangat na ang resulta sa board examination sa mga maestra, ang akong tinun-an nga si Bebe (tinuod ngalan gitago) wa nay gawas-gawas sa iyang lawak ug nagsegi na lang og maoy kay nakulbaan og nahadlok nga mahagbong.
Misamot iyang pagka-manggi-uwawon nga gwapa, buotan ug utukan man unta. Iyang rason, mahadlok siyang motubag ug mangutana kay basin og masayop unya kataw-an na hinuon.
Kining iyang gipakita nga kina-iya ehemplo sa ‘hinuwamang kahingawa’ kay wa pa gali mahibaw-i ang resulta sa examinasyon, nagpa-uraray naman kini sa negatibong gibati.
Dihang nangayo siya og tambag, ako siyang gibalik sa pagpangutana ining mosunod: kini ba silang mga nag-alirong nga imong gikahadlukan ug gika-uwawan kay kanunay manaway ug magyaga-yaga nimo maoy nagpakaon, nagbayad sa imong tuition ug review fees, naminaw sa imong mga yango-ngo, kaguol ug kahingawa?
Kung ang tubag dili, nganong hatagan man og balor ang ilang mga pulong ug buhat nga wa man kini ikatabang? Gani, nakapaluya pa hinuon kini sa gibati, nakabira sa personal nga tumong og diskaril sa padungang kalampusan.
Kini nga mga pangutana nakapahinuklog ug nakapamata ni Bebe kay tuod man, wa man silay labot sa iyang kinabuhi. In other words, dili kini sila importanti ug way labot sa iyang buot makab-ot.
Ngano kaha no nga ato mang lisud-lisuron ang sayon?
Kung mingawon, naa may mga paagi nga maka tawag, suwat, email o chat sa imong gika-mingawan.
Kung naay ma-ibgan o gustong higugmaon, imbitaha dayon, padad-i og buwak o gasa, o suwati para imong mapadayag ang nag-umidong tam-is nga gibati. Pilay palad, basin diay og nakagusto sab nimo.
Apan kung di, try and try again until you succeed, di ba? Kung dunay gikalibugan o wa masabti, ayaw itago sa hilom, ipaguwa kini ug ipangutana para ma klaro imong punto ug mapadayag imong rason para masabtan.
Kung naa sab kay gustong madawat, sultihi sa imong gusto ug ayaw pa tag-an tag-ana ang mohatag aron di malangay.
Ingon ini ra gyod ka simple, di ba?