USA ka adlaw, si Tulio sa kusog nga tingog nitiyabaw. Nidagan pasaka, didto sa ilang balay sa ibabaw. Sa tumang kasuko, ningitngit ang iyang panan-aw. Ngadto sa iyang bugtong anak, iyang kumo iyang ipatilaw.
“Nganong imong gibuak, ang karaang banga, bat-anang siaw?” Nakuratan si Tuliolito, sa iyang amahan nahibulong nga nagtan-aw. Sa kalit lang, nigawas ang iring og nagsayaw-sayaw, ug si Tulio nakasabot, sa iyang pagsuko-suko, siya naulaw.
Atong utrohon ang hulagway niining istorya kung ang amahan nagpugong sa iyang kasuko, ug nagcontrol sa iyang pagbati.
Usa ka adlaw, si Tulio sa kusog nga hagbong nakadungog. Nisaka sa balay, nakita ang karaang banga nga nahulog. Nakita pud niya si Tuliolito, ug iya kining gipangutana, iyang bugtong anak, nga kaniya ang baba nagnganga.
“Nganong nahulog ang banga, junior kong gwapito?” Tubag sa anak, “Sorry, Pa, pero wala ko kabalo.” Ug sa kalit nigawas ang sad-an, iring diay to! Nikatawa nalang sila, silang Tulio ug ang iyang ulitawo.
Apan ang importante, nga wala niya nahimo ang dili dapat niya himuon - kasab-an ang dili kasab-anan, ug pahimungtan ang walay sala nga anak nga buotan.
Daghan sa atong mga higala ang naay problema sa pagpugong. Sa druga, imnunon, sigarilyo, dili nila mapugngan niining mga bisyo. Kay lagi’y tumang gilamian, dili na kini nila gusto biyaan.
Maayo lang gani kay karong bulan sa Mayo, sa pagpugong ang mga ginikanan nakahibalo. Ang pang-tuition sa ilang mga kabataang gwapa og gwapo, og ilang gamit sa eskwelahan ilang giseguro.
Matud pa ni San Pablo, “Ang bunga sa Balaang Espiritu mao ang gugma, kalipay, kalinaw, pagkamaayo... pagpugong... batok niini walay kasugoan (Galacia 5: 22, 23, pinutol)." Kay unsa pa ma’y gamit sa kasugoan alang sa atong pakigrelasyon sa atong isigkatawo kung atong ginakinabuhi kining bunga sa Balaang Espiritu?
Kaniadtong Huwebes, Mayo 31, niapil ko sa parada sa anti-smoking nga kampanya. Sulod 16 ka mga tuig, ang Davao City niini nagpasiugda. Apil niining kampanya ang inyong higalang mga Adventista. Siento porciento ang suporta niining iglesya, aron mabatok ang epekto niining bisyuha.
Karong tuiga, akong nadunggan nga gipadak-an ang kalapad niining kampanya ug gitawag na kini’ng VRU o Vices Regulation Unit. Giapil na dinhi ang sigarilyo, makahubog nga imnunon, druga ug uban pang mga bisyo.
Matud pa ni Apostol Juan, “Ako nagapanghinaut nga anaa kamo sa maayong panglawas...” (3 John 2). Sa paghatag kanato sa Dios sa mga balaod nga makaayo sa atong panglawas, gusto Niya nga atong matagamtaman ang kaanindot nga mahatag sa atong himsog nga panglawas sa atong pagkinabuhi. Daghan sa atong mga higala nga buhi lagi tinuod, pero sa sakit nagaantos ug sa bayrunon sa hospital nagabaguod.
Busa, batok sa tanang bisyo ikaw magpugong. Aron ang kalipay sa kinabuhi, kanimo magpahiyom. Usa kini sa mga bidlisiw sa paglaum, nga maayong kaugmaon, imong maangkon.