DAVAO DEL SUR -- Hapit nga mag-usa ka tuig ang gipatumang Executive Order number 26 kun nationwide anti-smoking ban human gilagdaan ni Presidente Rodrigo Duterte ug gisugdan pagpatuman niadtong Hulyo 23, 2017.
Luyo niini, namatikdan sa mga nagpakabanang molupyo sa lalawigan nga dili kaayo hugot ang implementasyon niini sa bisan asang dapit.
Sa dakbayan sa Digos, gikanayon sa pasaherong si Gina, 42, nga daghan gihapon sa mga drayber ang nagabiyahe nga nagtangag og sigarilyo.
Hinuon, mga establishemento lamang ug mga buhatan sa gobyerno ang nipatuman niini sanglit nagbutang sila og mga designated smoking area gawas sa ilang mga establishemento.
Misumbong sab ang 57-anyos nga si Gaudencio Juntilla sa SunStar SuperBalita nga aduna gihapoy mga dispatcher og van nga nagapanigarilyo sa mga terminal sa lalawigan.
Alang niya, alaot silang dili manigarilyohay kay masimhot nila ang bahong aso niini ug hayan maapektuhan gihapon sila sa nicotine.
Bisan sa mga kalungsuran makita gihapon ang mga drayber nga nagahithit og sigarilyo panahon sa ilang byahe sanglit dili hugot ang pagpatuman niini sa kapulisan.
Dili lang mga drayber ang gireklamo sa mga nagpakabanang molupyo sanglit padayon nagapamaligya ang mga tindahan og sigarilyo ngadto sa mga menor de edad nga usa ka kalapasan sa balaod.
Gumikan niini gikanayon ni Police Senior Inspector Grace Jamila de Castro, pamuno sa Police Community Relations Officer sa provincial police office, nga mohimo sila og aksyon sa maong reklamo.
“We will conduct another round of information campaign ana tapos mag-direct mi sa lower units to coordinate with the primary implementor ana nga balaod which is ang DOH (Department of Health) para ma-aware sila nga ingon ana ang sitwasyon,” asoy ni de Castro.
Nasayran nga aduna say anti-smoking ordinance ang dakbayan diin gipahimagnoan ang publiko nga gidili pagpanigarilyo sa mga publikong sakyanan.
“Dapat ma-inform sa ang mga local government units para ma-direct ang mga other deputized offices under niya para ma-implement gyud og maayo ang balaod,” panapos ni de Castro.
Depende sab sa ordinansa sa lungsod o siyudad ang bayarang multa sa mga masakpang molapas niini.
Subay sa datos sa DOH, nasayran nga moabot sa 17 ka mga tawo ang mamatay kada adlaw o kapin 87 mil ka mga tawo mamatay matag tuig tungod sa komplikasyon sa pagpanigarilyo. (Orlando B. Dinoy)