GIPAMATUD-AN ni Cebu chess wizard Alphecca Gonzales nga andam na siyang makigharong batok sa mas dekalidad nga mga kontra human niya nadaog ang women’s junior division sa 2018 Asian Universities Chess Championship niadtong Sabado sa Tagaytay.
Ang 14-anyos nga Gonzales, kinsa magtutungha sa Ramon M. Durano Sr. Foundation-Science and Technology Education, mipukan sa iyang mas edaran nga mga kontra sa 18-Under tournament ug mirehistro og 5.5 points human sa siyam ka rounds.
Ang 2017 ug 2016 Palarong Pambansa gold medalist maoy nag-una sa sa 18-Under ug kasamtangan ikaunom sa 27-Under sa torneyo nga nagsugod niadtong Mayo 26.
Si Gonzales mipakita sa iyang kahanas human niya pildiha ang high-rated nga si Hu Yu sa China sa Round 6 ug nakatabla kang Woman International Master (WIM) Qiu Mengjie sa Shanghai University of Finance and Economics sa sunod nga round.
Gipanglupig sab ni Gonzales sila si Angel Sayaman sa Round 2, Hisham Nur Najiha sa Malaysia sa Round 4, Kishey Ibanez sa Round 5 ug Rui Liao sa China sa final round.
Si Gamaliel Gonzales, kinsa amahan ni Alpheca nanghinabi sa Sunstar Cebu, igsuong buhatan ning mantalaan, nagkanayon nga mao kini ang labing dakong kalampusan sa iyang anak.
“We did not expect to win this because it was her first time to play in this tournament and first also to compete with WGM (Woman Grandmaster), WIM (Woman International Master, WCM (Woman Candidate Master) and WFM (Woman Fide Master),” matod ni Gamaliel.
Si Gonzales gikatakdang mosalmot sa 19th Association of Southeast Asian Nation (Asean) Chess Championships diin iyang tinguha nga makakuha og WFM title. Moduwa siya sa girl’s 14-Under nga ipahigayon sa The Royal Mandaya Hotel sa Davao City karong umaabot nga Hunyo 18-28.
“Kung mo daog siya, mas dako iyang tyansa nga makuha ang WFM title,” dugang ni Gamliel. (Clark Jude Suhot, CNU Comm Intern)