UGA nikampyon sa Coupa beach Frisbee

GIHAWOD sa visiting Ultimate Green Archers-Iligan City (UGA-Iligan) ang Cagayan de Oro Ultimate Players Association (Coupa) sunset session vol. 2 niadtong Dominggo didto sa Jesper Beach, Barangay Bonbon.

Kini, human giparot sa Green Archers ang pambato sa Cagayan de Oro nga ang Ateneo Blue Ultimate (ABU), 13-8, sa final.

Nitala si Jigze Rafisura og upat ka puntos ug tagsa ka assist ug block aron mangulo sa UGA, samtang niabag sab si Elka Corporal og tulo ka puntos ug duha ka assist.

Dako sab og tabang sila Jok-Jok Pacana ug Tan-Tan Ermac agi paghatag og upat ka assists ug duha ka puntos kada usa.

Gipilde una sa Green Archers ang Ateneo Blue sa elimination round agi sa iskor 9-6.

Nihuman ang UGA nga walay tatsa human gilaras nila ang ilang tanan 10 ka dula sa elimination round.

Nangulo sab si Marianne Casinillo sa ABU nga anaay tulo ka puntos ug usa ka block, samtang niabag sab sil Harry Jones Chaves og tulo ka assists.

Pagpaingon nila sa final, nakalingkawas ang Green Archers ang usa pa ka team sa Iligan nga ang Gecko agi sa 9-8 kulbahinam nga daug.

Nagtabla sila sa 8-8 pag-expire sa oras, apan napuntosan sa UGA pagsilyo sa kadaogan human gikompleto nila ang kataposang play.

“Expire na ang oras ug kinanlan makompleto ang kataposang play mao nga ang UGA maoy nakasilyo sa daug,” ingon ni Aldrich Barba, usa sa mga technical official sa beach Frisbee.

Abante sab ang ABU sa final human giparot nila ang Brad, 10-7, aron maagbat ang UGA sa ikaduhang higayon.

Nilanding lang ang ABU sa ikaduhang dapit, samtang naa ang Gecko ug Brad sa ikatulo ug ikaupat nga pwesto, sunod-sunod.

Nanganlan si Rafisura isip most valuable male player sa torneyo, samtang si Mafel Carreon sa Gecko maoy female MVP. Nanganan sab sila isip highest scorings sa ilang category.

Sa uban individual awards, naangkon nila Bboi Callo (Gecko) ug Chesna Valdez (Fake Taxi) ang best blocker awards sa male ug female category, sunod-sunod.

Sila sab Greg Salazar (ABU) ug Treja Emano (Groot) maoy best assist sa male ug female category, sunod-sunod.

Nanganlan sab sila Callo, Ermac, Rain Sanggalang (Brad) ug Casinillo sa mythical four.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph