KON duna kay tinigom ug gusto kang mas dako kini og tubo, ang kagamhanan nagtanyag karon sa publiko sa ilang Retail Treasury Bonds (RTB).
Ang treasury bonds iya sa kagamhanan nga dunay fixed interest rate nga mas dagko kay sa mga interest rate nga gitanyag sa mga bangko alang sa time deposit account, busa, mas dako og kitaon ang imong kwarta.
Wa pa kini risgo kay iya kini sa kagamhanan.
Si Deputy Treasurer of the Philippines Erwin D. Sta. Ana, atol sa Investor’s Briefing nga gipahigayon sa Marco Polo Hotel niadtong Hunyo 1, miawhag sa publiko sa pagpamalit sa treasury bonds kay mas maayo nga investment kay seguradong di maalkansi.
Paagi usab kini sa pagtabang sa kagamhanan sa pagpatuman sa mga proyektong imprastraktura nga gipaabot nga mopalambo sa ekonomiya.
Naa na kini sa ika 18 nga tuig.
“For 18 years running, the TRB program has been an integral part if supporting the country’s socio-economic program across various administrations,” matod ni Sta. Ana.
Ang RTB dunay fixed rate nga 4.875% per annum kun kada tuig.
Ang public offering gisugdan niadtong Mayo 30 ug matapos karong Hunyo 8, 2013.
Ang petsa sa pag-issue Hunyo 13, 2018 ug mo-mature kini sud sa tulo ka tuig kun Hunyo 13, 20210
Ang minimum nga denominasyon sa matag bond P5,000 mao nga gihulagway kini nga “affordable” kun makaya ni bisan kinsa ug wa pay bayranan.
Bayran ka pa kada quarter sa interest, apan kuhaan kini og 20 porsyento nga witholding tax.
Niadtong gustong mopalit, kinahanglan duna kay account sa dagkong mga bangko sama sa Metrobank, Banco de Oro Universal Bank, Bank of Commerce, Citibank N.A., ING Bank, Philippine Bank of Communications, Security Bank Corporation, Union Bank of the Philippines, BDO Capital and Investment Corporation ug uban pa.
Si Santa Maria niingon nga maayo og lakaw ang mga public offering sa mga treasury bank dinhi sa Sugbo busa, usa kini sa mga dapit sa nasod nga ilang giduaw kanunay.
Ikaupat na kini nga tranche ubos sa administrasyon ni Presidente Rodrigo Duterte. (REV)