NANAWAGAN karon ang mga kabanay sa pasyente, kinsa nipasangil nga sila gibalibaran sa Lapu-Lapu City District Hospital sa Karahay, Brgy. Gun-ob, nga madisiplina ang mga nars ug doktor sa emergency room nga “nibiaybiay” kanila sa ilang pagka-uyamot.
Kini maoy panawagan ni Danny Montecalvo, igsuon ni Rey, 44, bana ni Delvet Delos Niños, hingkod, kinsa nagbati ug nanganak niadtong Mayo 30.
Apan ang hospital official niklaro nga ilang gidawat ang pasyente, apan gibalhin sa laing pampublikong tambalanan, diin didto usab kini namatay.
Matod ni Montelcalvo nga sa maong adlaw, nagbati iyang bayaw nga si Delvet ug nangayo siyag pakitabang sa ilang nars sa Brgy. Basak nga iyang kaila, kinsa ginganlan og “Lynlyn.”
Si Montecalvo niingon nga iya nang gipahibawng daan si Lynlyn nga naglisod ug wa pay kwarta ang iyang manghud niadtong higayuna.
“Pag-abot didto, naghinagwaay naman na ang mga nurse ug doktor sa emergency, ‘Wa nay mga kwarta, Ma’am. Wa nay mga kwarta. Naa nay mga kwarta pero P100 ra na ang natigum. Nagkinataw-anay sila unya naminaw ra gyud na akong manghud ug ang asawa sa akong manghud nga nagping-it-ping-it sa kasakit ug nagluspad na,” ni Montecalvo sa dihang nahinabi sa Superbalita Cebu kagahapon.
Matod niya nga gipapalit og mga tambal ug dextrose ang iyang manghud alang sa asawa niini.
Apan usa ka kawani sa maong tambalanan ang niingong ibalhin sila sa Vicente Sotto Memorial Medical Center tungod kay “wa silay kwarta.”
“Wala diay moy mga kwarta diay? Uy, irefer ta mo sa Sotto kay maayo didto kay naa moy daghan kaduolan,”sigun pa sa usa ka kawani sa LLCDH ngadto sa magtiayon base sa taho ni Montecalvo.
Gitataw niya nga wa man maka-ila ang iyang manghud ug bayaw sa mga nars ug doktor ,apan kahinumdom pa gihapon kini sa dagway kon magkakita pagbalik.
Tuod man, nibalhin ngadto sa VSMMC ang magtiayon para manganak apan patayng nang gipangak ni Delvet iyang anak.
Ang maong insidente gi-post mismo ni Montecalvo sa iyang social media nga iyang gisukipan og hulagway sa lubong sa iyang pag-umangkon sa Sogod, Cebu.
Ang iyang post nag-viral ug nakaangkon og kapin sa 22,000 ka reaksyon ug kapin sa 21,000 nga shares sa Facebook mga alas 5 sa hapon kagahapon.
Sa dihang gikuhaan og reaksyon, si Lapu-lapu City Mayor Paz Radaza ningon nga nipadangat dayon siya og tabang sa banayng Montecalvo human mabasahi niya ang post niadtong Sabado pinaagi sa officer-in-charge sa medical assistance sa VSMMC nga si Felix Inot.
Ang Kagamhanan sa Dakbayan nangita dayon og dugo nga O+ alang ni Delvet apan reklamo ni Montecalvo sa VSMMC nga hangtod karon wa pa abunohi og dugo sa tambalanan ang iyang bayaw.
Si Dr. Cliff Canton, chief of hospital sa LLCDH, niingon nga “unfair” ang gi-post ni Montecalvo sa social media nga nakabati sa imahe sa maong tambalanan.
Nagtuo siya nga posibleng nahiubos nga gi-transfer ang pasyente ngadto sa VSSMC.
“Gibuhat lang namo ang saktong among gibuhat, dili nga nagbugalbugal mi kay kinabuhi baya gyud na. Di gyud na mahimo nga mangatawa mi kay pobre ang pasyente. It’s because anad na mi ana kay public hospital mi,” ni Canton ning mantalaan.
Gipasaabot ni Canton nga level 1 nga tambalanan ang LLCDH ug ang mga doktor niini di mahimong maka-handle og komplikadong kaso sa pagpanganak maong kon sila makasugat og komplikadong kaso sama sa taas og blood pressure, adunay mga sakit, ibalhin kini ngadto sa mga tambalanan nga adunay igong kapasidad ug kahimanan.
“Ganahan sila ari sa Opon, wala sila magtan-aw sa level of hospital namo nga di gyud namo kaya na. They are expecting too much sa among hospital, maong nahiubos sila I-transfer kay wala sila kasabot. Ang designation namo as government doctor, di mi allowed mo handle og complicated cases sa mga OB. Ang among mga doktor dinha trained ra na sila mopaanak og normal,” ni Canton.