NAMINAW ko sa panahom sa mga tawo nga gikauban ni anhing Secretary Cerge Remonde. Nindot kaayo ang ilang mga kasinatian.

Dunay uban nga naghisgot og utang kabubut-on, pagpakabana, paghigugma sa trabaho og pag-alagad sa katawhan. Nindot man ang ilang kasinatian karon pulos na lang mga paghandom ang tanan kay ang tawo nga nahimong tinubdan ning tanan kalit man lang mitaliwan. Usa ko sa nasubo sa gidangatan ni Cerge sanglit wa gyud mi magkita sa milabayng mga bulan. Bisan kadtong pinakauwahi nga pagduaw niya sa Sugbo pulos sugilanon lang ang akong nadunggan. Sama pananglit sa iyang pagpasingot pagguroy sa karosa ug ang iyang pagsalmot sa fluvial procession ug ang hamubo nga pag-estar sa sports center atol sa Sinulog mardi gras.

ITUG-AN

Click here for stories and updates on the Sinulog 2010 Festival.

Gusto nakong tug-anan ang akong mga kauban sa media og ang publiko nga posibling ma-interesado sa usa ka butang nga nagdugtong namo ni Cerge matag higayon nga magkita mi. Niadtong aktibo pa kaayo siya sa Kapisanan ng mga Brodkaster sa Pilipinas Cebu Chapter, isip usa sa mga haligi, akong gisugyot kaniya kon mahimo ba nga malakip sa iyang programa ang pagpabarog og KBP-Cebu Building. Ako siyang gipasabot nga sa maong building mahimong butangan og library diin mabasa ang mga karaang script sa drama ug mapaminaw ang mga karaang programa sa mga mitaliwan nga komentarista o news program.

Dunay convenient store, cafeteria og presscon area. Labaw sa tanan duna pa gyu’y katulganan alang sa mga brodkaster nga magabhian. Dako ang akong kalipay nga way duha- duha nga gidawat ug gidayeg ni Cerge ang maong sugyot. Di ko makatuo nga ang usa ka Cerge Remonde mobelib sa maong ideya gikan sa usa ka ordinaryong reporter. Tuod man pipila ka semana human nako maduso ang maong sugyot nagkita mi sa usa ka okasyon ug iyaha kong gisangonan pagpangita og yuta nga kaugbokan sa maong building.

PANINGLAN

Seryuso si Cerge sa maong proyekto galing lang naglisod gyud ko pagpangita og yuta. Hangtod nga nibiya siya sa Sugbo ug sa Manila na nagtrabaho. Wa na nako matagad ang iyang gisugo kanako. Apan wa ko magtuo nga sa matag higayon nga magkakita mi, kanunay siyang nangumusta kong nakakita nako og yuta para sa maong building. Karon nga wa na si Cerge wa na’y maningil nako mahitungod sa yuta. Ubos sa akong pagtuo mas labaw siyang malipay nga bisan kon wa na siya nga mag follow up, mahatagan og katumanan kining maong proyekto nga gusto nakong tawgon nga Cerge Remonde Media Center.

Pasiuna nakong gisugyot kang Leo Lastimosa nga interesado sab nga kini mobarog, ang South Road Properties maoy haom nga dapit nga kini pabarugon. Ug unsa may mahitabo ning maong plano, manghinaot ko nga mahatagan kini og katumanan.