NIPATUMAN og food-for-work program ang Kapitolyo alang sa mga mag-uuma sa duha ka mga barangay sa lungsod sa Asturias nga naapektohan sa Rice Tungro Diseases (RTD).
Gitug-an ni LDRRM officer Wilson Ramos nga moabot sa 59 ka mga mag-uuma sa Barangay Lunas ug laing 51 sa Barangay Bago ang makadawat og lima ka kilong bugas ug mga delata sulod sa lima ka adlaw alang sa food for work program.
Sa maong programa, ang mga mag-uuma ug ang ilang pamilya maoy molimpyo o mohawan sa maobot 71.5 ektaryang luna nga maoy gibalik-balikan sa green leaf hopper, nga maoy giingong carrier sa tungro virus.
Ang Provincial Agriculture Office nirekomendar nga sunogon ang tanang humay ug binhi nga naapektohan sa sakit ug ilubong aron di na mosanay.
Gawas sa cash for work program, laing tag-lima ka kilong bugas ang ihatag sa Kapitolyo sa mga apektadong mag-uuma sulod sa tulo ka adlaw, isip kabahin sa relief operation, nunot sa pagka-wala sa ilang kita. (AZDLG)