MALAMPUSONG nadepensahan sa Laguindingan basketball teams ang ilang balwarte atol pag-host nila sa 2018 Kuyamis Sportsfest Governor Yevgeny “Bambi” Emano Cup basketball tournament niadtong Sabado, Hunyo 2, didto sa Laguindingan municipal covered courts.
Kini human wala padag-a sa ilang mga pambato ang ilang mga bisita gikan Tagoloan ug Manticao.
Naangkon sa Laguindingan Heights ang unang daug pag-abri sa ilang kampanya sa 25-under men’s division agi sa 91-84 nga kadaogan kontra Tagoloan Tarantulas.
Nitala si Julien Madridano og 24 puntos aron mangulo sa Heights, samtang niabag si Wilfred Salupan og 15.
Nihatag sab og dako si James Honculada og 23 puntos sa kapildehan sa Tarantulas, samtang nikulit og 18 puntos si Brian Taga-Taga.
Sa pikas bahin, nakadaug ra ang Laguindingan sr. Heights human gipilde nila ang Usbaw Manticao, 88-69, sa LGU men’s division.
Nibida si Nante Baclayon sa kadaogan sa sr. Heights agi paghuman og 26 puntos, samtang nikolekta si Darwin Garcia og 14 nga puntos.
Nakabangon ra ang sr. Heights gikan nataboan og pilde kontra sa Jasaan, 74-100, pag-abli sa ilang unang dula niagi.
Pag-abli sa basketball tournament sa maong adlawa, hingpit nakalingkawas ang Alubijid kontra sa Luagit, 64-63, sa 18-under boys division.