PATAY ang usa ka lalaki human nga nadigyas ug nabunal ang ulo sa sementadong bahin sa kalsada niadtong Martes sa buntag, Hunyo 5, sa Agora, Lapasan, dakbayan sa Cagayan de Oro.
Patay dihang nahidangat sa tambalanan si Gudy Barsobia, 24, ulitawo ug residente sa Zone-4, San Lazaro, Lapasan.
Sa nahipos nga impormasiyon gikan sa kapulisan sa Police Station 3 (PS3) sa Agora, gikabutyag nga usa ka sekyu sa Integrated Bus Terminal (IBT) ang mitaho kabahin sa hitabo.
Sa pakighinabi sa SunStar SuperBalita kang Police Inspector Michael Daba, deputy station commander, nga samtang nagbaklay ang biktima sa dapit aksidente kini nga nadigyas ug nalukapa ug wala’y swerteng nahapak ang ulo niini sa sementadong bahin sa maong dapit.
Dali pa kining gidala sa tinugyanan sa Oro Rescue sa Northern Mindanao Medical Center apan nakabsan na kini sa kinabuhi pag-abot sa tambalanan.
Gikompirma usab sa mga igsuon nga sila si Breal ug Bregido Barsobia nga adunay sakit nga epelipisya o patol ang namatay nga biktima diin gidudahan usab nga posibleng nakasinati kini sa maong balati-an atol sa insidente.
Karong panahona, ang patay nga lawas ang gi-atiman na sa nahabiling pamilya.