ANG Philippine Lady Volcanoes abante na sa kampeyonato human gilampaso ang India, 19-5, niadtong Martes sa nagapadayong Asia Rugby Women's Championship (ARWC) Division 1 sa Queenstown Stadium sa Singapore.
Human sa unom ka tuig nga pahulay niini sa kompetisyon, ang tim mibalik uban sa ilang bag-ong miyembro ug mga kusog nga “rookies.”
Sila Sylvia Tudoc, Tanya Bird ug Ada Milby parehong mitala og lima ka puntos samtang si Agot Danton, ang pambato sa Davao Durians Rugby Football Club ug produkto sa Philippine Rugby Football Union’s Get Into Rugby Program sa SOS Children's Village sa Davao City, midugang og laing upat ka “conversions” aron manguna sa pagyabo sa Lady Volcanoe's sa mga Indiana.
Sunod nga makalaban sa nasyunal tim ang host nga Singapore, kinsa una milubong sa India niadtong Sabado sa iskor 30-5 sa torneyo. (Marizz R. Perez)