DUHA ka mga City Traffic Operations Management (Citom) traffic enforcer ang naa karon sa dakong problema human akusahing nangulata ug nanunggab sa ila ra sab nga higala nga kawani sa Department of Education (DepEd).
Ang giingong pagpanunggab nahitabo atol sa ilang panag-inom sa may dalan P. Burgos, Barangay San Roque, siyudad sa Sugbo pasado alas 9 sa milabayng gabii.
Ang biktimang nasamdan sa wa nga kilid ug nabun-og sa iyang kalawasan mao si Hermogenes Sarbida Jr., 25,utility worker sa DepEd, nagpuyo sa maong dapit.
Ang kapulisan niila sa mga suspek nga sila si Michael Garces, 33, taga dalan Tormis, Barangay Sambag 2 ning siyudad ug si Enfanty Ybañez, 32, taga MJ Cuenco avenue, pulos nadistino sa Taskforce Jaywalking.
Sa pasiuna nga imbestigasyon nga gihimo nila ni PO3 Geofrey Gutual, PO2 Leroy Baguio, PO2 Lou Pagara ug PO1 Geronimo Cristobal sa Homicide Section nagbutyag nga nag-inom ang biktima uban sa duha ka mga suspek.
Atol sa ilang panag-inom, kalit lang silang nagkalalis.
Unang nisumbag kang Sarbida mao si Garces ug dihang siya natumba, nikuha og kutsilyo si Ybañez dayong dunggab sa biktima.
Naalarma ang mga tawo sa dapit nga nakakita sa karambola hinungdan nga nanawag og kapulisan.
Nanagan ang mga suspek samtang siya gibiyaang nagkadugo.
Ang inahan ni Sarbida nga si Lydia Canuday-Regis ug ang kapulisan ningdala sa biktima sa tambalanan, samtang ang mga suspek ningtahan ngadto kang Inspector Pedy Noval sa Presento Tres.
Atol sa hitabo, wa pa maimbestigar ang mga suspek kay hubog pa kaayo.
Apan nasayran sa Sun.Star Superbalita gikan sa usa ka operator sa Citom nga ang duha ka mga enforcer gisuspenso tungod sa hitabo.
Di pa dayon sila makabalik hangtod nga di pa masulbad ang kaso nga ilang atubangon tungod sa hitabo.
Samtang sa laing hitabo, tungod sa pagguroy og mga sakyanan bisan diha pa ang duha ka mga tag-iya, duha ka mga traffic enforcer ang gipangtaktak ni Cebu City Mayor Tomas Osmeña.
Matod niya sa iyang press conference kagahapon nga sila si James Vanguardia ug Roland Debalucos nagpatuong agents sila sa usa sa mga kompaniya sa towing nga nagserbisyo sa Siyudad.
Si Osmeña niingon nga ang duha ningguroy sa sakyanan bisan ang mga tag-iya diha.
“They made it appear they were employees of the towing company.
I decided to make it (dismissal of the two employees) public to send a message to those who may have a similar idea,” matod sa mayor.
Siya nidugang nga nakadawat siyag mga taho kalabot sa managlahing gibuhat sa duha.
Ang ningsumbong kaniya mao ang iyang mga higala nga ningpatunga aron di maguroy ang mga sakyanan.
“I don’t know who the real owners were…. But it doesn’t matter. You’re the mayor, you are a friend of everybody,” nagkanayon si Osmeña.
“You just can’t have traffic enforcers acting like agents of the towing company,”matod niya. (JFT)