SUGOD karong adlawa ang kapulisan sa lalawigan sa Sugbo ipa-ilawom na sa heightened alert.
Kini human nga si Presidente Gloria Macapagal Arroyo gikatahong moanhi sa Sugbo aron mohatod sa haya ni Press Secretary Serge Remonde nga ilubong ugmang adlawa sa lungsod niyang natawhan sa Argao.
Si Senior Supt. Erson Digal, pangulo sa Cebu Provincial Police Office (CPPO), niingon nga ila nang nahan-ay ang tanang pagpangandam alang sa seguridad sa paglubong.
Gani mga 50 ka mga pulis ang ilang idugang sa Argao Police Station, wa pay labot sa mga sakop sa 78th Infantry Battalion (IB) sa Philippine Army ug sa mga sakop sa Special Reaction Unit (SRU).
Apan human nila masayri nga si Arroyo moanhi sa Sugbo, mas hugot pa unya nga siguridad ang ilang himuon.
Gipaabot nga gawas sa mga dagkong opisyal dinhi sa Sugbo ug sa kaulohan liboan pa unya nga mga tawo ang mohatod sa lawas sa kalihim nga giilang garbo sa mga Argawanon.
Gipaabot nga liboan ang mosalmot usab sa public viewing sa Diosdado Macapagal Sports Complex sa lungsod, diin siya hayaon og usa ka gabii.
Si Remonde namatay sa atake sa kasingkasing pipila ka mga adlaw ang nakalabay. (DRT)