2 samdan sa pagpamusil; away sa 2 ka mga gang gidudahang maoy hinungdan
NADALA sa tambalanan ang usa ka sakop sa gang ug laing usa pa ka batan-on human sila gipamusil sa gidudahang mga sakop sa karibal nga gang pasado alas 4 sa milabay nga hapon sa Rizal Avenue Extention, Tagunol, Basak San Nicolas, siyudad sa Sugbo.
Ang biktimang samdan sa iyang buko-buko giilang mao si Jeric, 15, nagpuyo sa maong dapit, gituohang sakop sa Crips gang samtang laing nasamdan sa iyang sampot human mapagan mao si Nesemmar Edillon, 26, iyang silingan.
Ang mga suspek nga gituohang mga sakop sa karibal nga Bloods gang naila lang sa mga alyas nga Toto ug Ekong.
Ang pasiuna nga imbestigasyon sa Homicide Section sa Cebu City Police Office (CCPO) nagbutyag nga gikan naghakot og bas si Gabuya ug gisugat sa iyang higala nga si Junior Quirino.
Kalit lang niabot ang duha ka mga suspek, ningbunot og mga armas ug dayong pusil kang Gabuya.
Si Edillon nga igo lang niagi sa dapit atol sa hitabo naigo usab sa pagpamusil.
Human sa hitabo, daling ningsibat ang mga suspek samtang ang mga biktima luwas na sa delikado nga kahimtang sulod sa tambalanan.
Gituohan sa kapulisan nga panagbangi sa managkaribal nga mga gang ang gitumbok nga posibling hinungdan sa hitabo. (JFT)