GIPAABOT nga liboan ka mga Argawanon ang magbaha sa kadalanan aron pag-atang ug pagsugat sa lawas ni Press Sec. Cerge Remonde karong buntag sa iyang pagbalik na sa Argao.

Gipaabot nga alas 12 karong udto moabot ang lawas ni Remonde sa iyang lungsod nga natawhan human sa ipahigayong misa mga alas 9 karong buntag sa Malacañang sa Sugbo.

Click here for stories and updates on the Sinulog 2010 Festival.

Kagahapon niabot ang lawas ni Remonde dinhi sa Sugbo ug gihaya og usa ka gabii sa Malacanang sa Sugbo.

Sunodsunod nga mga misa ang gipahigayon usab kagahapon apil na ang necrological services nga gihalad sa mga kauban ni Remonde sa Cebu media.

Gawas sa iyang asawa nga si Marit, mga sakop sa pamilya ug pipila ka mga kauban sa gobyerno nga nikuyog sa pag-abot sa lawas ni Remonde, mga local nga opisyal sa Sugbo, mga sakop sa Cebu media ug iyang mga kababayan sa Argao ang ningsugat usab kaniya sa airport kagahapon.

Usa ka military honors ang gipahigayon sa pag-abot sa haya ni Remonde luwan sa C130 military plane sa Mactan Benito Ebuen Air Base.

Lakip sa ningsugat mao sila si Cebu City Vice Mayor Michael Rama ug Argao Mayor Edcel Galleos.

Usa sa mga igsuon ni Remonde nagbitbit sa imahen sa Sr. Sto. Niño nga iya sa kalihim nga naatol sab sa gipahigayong “Hubo” sa Balaang Bata.

Gikan sa Mactan, diretsong gidala ang haya ngadto sa Malacañang sa Sugbo.

Samtang ang uban pa niyang mga higala ug mga fans dihang nagsibya pa kini sa dyLA nag-atang sa iyang pag-abot sa Malacañang kagahapon sa udto.

Sa wa pa usab moabot ang lawas ni Remonde, nagsunodsunod usab ang pag-abot sa mga buwak nga gipadala sa dagkong mga kompanya ug inilang mga tawo dinhi sa Sugbo.

Usa ka batalyong sundawo sa Central Command ang nisugat kang Remonde sa wa pa kini gisud sa ceremonial hall.

Human mapahiluna ug matarong si Remonde, gibuksan na dayon ang iyang haya alang sa public viewing.

Apil sa unang nakasud-ong mao ang iyang mga paryente ug kababayan sa Argao nga naglakip sa mga opisyal sa lungsod apil na ang mga kapitan sa tanang barangay sa Argao.

Matod ni Mayor Edcel Galleos nga nagpakyaw siya og bus nga maoy gisakyan sa iyang gidalang mga opisyal.

“Amo siyang sugaton sa boundary sa Sibonga. Mag-line-up ang mga bata, mga barangay opisyal ug mga tawo sa dan nga magdala og flaglets down ngadto sa iyang balay sa Lamacan,” butyag pa ni Galleos sa paagi sa ilang pagsugat sa giilang garbo sa ilang lungsod.

Mohapit ang lawas ni Remonde sa iyang pinuy-anan alang sa mubo nga seremonyas, apan matod ni Galleos nga di na kini ikanaog pa kay ilahos na dayon sa Diosdado Macapagal Sports and Cultural Center diin kini buksan alang sa public viewing.

Mga alas 3 karong hapon, usa ka misa nga gi-esponsor ni Gov. Gwen Garcia ang ipahigayon ug laing misa karong gabii ang himuon sa tanang Argawanon nga mga pari.

Gawas sa pagdeklarar og day of mourning, plano usab sa kagamhanan sa Argao nga mohatag og pasidungog kang Remonde diin ang ilang ihatag mao ang labing taas nga pasidungog nga mahatag sa lungsod ug una kini nilang ihatag kang Remonde.

Mga alas 12 ugma sa udto gikatakda ang requiem mass ug alas 2 sa hapon gikatakda ang pag-abot nila sa menteryo.

Apan tungod kay gipaabot nga liboan ka mga Argawanon ang mohatod kang Remonde sa iyang katapusang pahulayanan, matod ni Galleos nga mga pamilya ug suod nga higala lang siguro ang tugtang makasud sa menteryo.

“Mao nang makig-sit down pa gyud ko sa crowd control kay mao nay akong gitan-aw karon kay gamay ra gyud kaayo ang lugar sa menteryo unya daghan gyud na ang mga tawo ana,” nagkanayon si Galleos.

Samtang si Rama sa iyang bahin nibutyag nga gisugyot niya sa konseho nga hatagan og tribute si Remonde.

Wa pa hinuon matino kon unsa nga matang nga tribute ang ilang ihatag kay matod ni Rama ila kining i-discuss ug ila sab nga agdon kon unsay gusto ni Mayor Tomas Osmeña.

Apan wa isalikway ni Rama nga posibling mohingan sila og dan alang kang Remonde.

Matod ni Rama nga nahatag na sa Siyudad ang usa sa mga pasidungog ngadto kang Remonde nga mao ang outstanding Cebuano sa niaging Charter Day ug gusto nilang hatagan kini og laing tribute gawas sa maong pasidungog.