USA ka amahan ang mi-unay pagluba sa iyang anak niadtong Huwebes mga alas 2:00 sa hapon didto sa Vistavilla, lungsod sa Sumilao, Bukidnon.

Gidala sa Northern Mindanao Medical Center (NMMC) ning siyudad sa Cagayan de Oro ang biktima nga mao si Francis Bentunan, 21, ulitawo ug gitumbok nga suspetsado ang amahan nga mao si Rolando, 46.

Sa gihimong pakighinabi sa Sun.Star Superbalita ngadto sa usa sa paryente sa biktima gibutyag niini nga dunay pagkamaldito si Francis.

Gani pipila na ka higayon misokol kini sa iyang mga ginikan labina ngadto sa iyang amahan kung kini masuko ug mahubog. Giingong wala usab kini pagtahod sa iyang amahan.

Hinungdan nga niadtong Huwebes giingong unang gibikil niini si Rolando hinungdan nga nasuko na usab ang amahan ug sa kalagot mikuha kini og kutsilyo dayon deretso nga giluba ang anak.

Nakaangkon og samad sa tiyan nga bahin si Francis ug dali nga gidala sa duol nga balay tambalanan sa maong dapit apan giduso sa NMMC ning siyudad tungod kay lawom nga samad ang naangkon niini.

Bisan ang inahan sa biktima giingong wala mibasol sa iyang bana sa gihimo niini sa anak.

Sa pagsulat ning balita nagpabilin pa sa balay tambalanan si Francis nga padayon pang giobserbahan sa mga doktor samtang ang amahan dako ang pagbasol sa gihimong pagluba sa anak.