PANABO CITY - Giingong init nga mga isyu sa politika sa Davao del Norte ang sagad sud sa mantalaan nga Trends and Times weekly newspaper nga maoy usa sa gitan-aw karon nga anggulo sa pagpatay sa publisher niini kagahapon sa hapon.
Sa inisyal nga imbestigasyon, blangko pa karon ang kapulisan sa Panabo City Police Station sa mipatay sa publisher sa weekly nga mantalaan sa siyudad sa Panabo nga si Dennis Denora, 67, kinsa gipusil samtang sakay sa iyang sakyanan didto sa National Highway atubangan sa Century Bank, Panabo City.
Uban sa biktima ang iyang drayber nga si Mayonito Revira nga nagmaneho sa Hyundai Elantra kolor puti dunay plaka numero ADP-4822.
Samtang nagdagan ang kotse sa National highway sa Barangay New Pandan, kalit gipusil sa wa pa mailhing mamumuno ang biktima kinsa dead on the spot samtang igo sa kamot ang nahiagoman sa drayber nga anaa karon sa Rivera Medical Center sa Panabo.
Ang nahitabo gilayong gikondena sa National Union of Journalists (NUJP) Davao Chapter kinsa nag-ila ni Denora nga usa sa mga tigbalita sa Davao Region nga nagsuwat sa Sun.Star Davao.
Sa pagsubay sa Sun.Star Davao SuperBalita, si Denora dili regular nga empleyado sa Sun.Star Davao apan naga-contribute lamang siya og pipila ka artikulo sa Sun.Star sa mga istorya sa politiko sa Davao del Norte.
Usa ka parallel investigation ang gihimo sa kapulisan ug gitukod ang Task Force Dennis Denora sa Police Regional Office sa Davao Region (PRO) 11.