GIPATAAS na sa Sta. Cruz Police Office ang alerto aron bantayan ang mga nag-unang pasilidad sa komunikasyon palibot sa lungsod.
Nunot kini sa nahitabong engkwentro tali sa grupo sa Civilian Armed Forces Geographical Unit (Cafgu) ug grupo ni Ka Jag-jag, ubos sa committee front 51 sa rebeldeng New People's Army, niadtong Huwebes.
Nilungtad sa 15 minutos ang pagbinayloay og mga bala dihang nakatagbo sa grupo sa 72nd Infantry Battalion (IB) nga gipangulohan ni Cpl. George Ulaw sa 39th IB, ang mga rebelde.
Nahitabo ang away didto sa Sitio Langon, Barangay Coronon, samtang nagpatrolya ang militar human madawat ang taho nga nagpahipi sa lugar ang mga NPA.
Unang gitataw ni 1Lt. Raul Villegas, Civil Military Operations (CMO) officer sa 39th IB nga didto nagtago sa panimalay nila ni Lolong Simbajon ug Beloy Panday ang mga rebelde.
"Pinaalis nga nila yung ibang tao doon kasi parang hinihintay nila ang extortion money from big companies," ni Villegas.
Nagpasalamat na lamang ang kasundaluhan nga way namatay kanila bisan og naigo sa iyang sampot ug paa si CAA Antonio Amo niadtong higayona, kinsa nagpabilin pa sa ospital.
Si Davao del Sur provincial police commander Senior Superintendent Ronald Dela Rosa, nagmando dayon sa iyang ginsakpan nga pakusgan pa ang community intelligence monitoring ilabi pa kay anaa sa lugar ang mga dagkong kompanya sama sa San Miguel Brewery Corporation, Hydropower Energy Development Corporation (Hedcor) ug ang Franklin Baker Company.
Gibutyag sa kasundaluhan nga buot mangilkil ang mga rebelde sanglit nagkaduol ang piniliay karong tuiga nangandam na sab sila aron mangayo og permit to campaign ngadto sa mga pulitiko.
Si Lieutenant Colonel Lyndon Panisa, 39th IB commanding officer, nagkanayon nga di sila moundang sa ilang pagpatrolya aron tiktikan ang kampo sa mga rebelde nga gikatahong anaa ra sa palibot.
Apan, nakasaway ngadto sa mga NPA ang militar sanglit didto kini nagpundo sa lugar diin daghan ang kabalayan mao nga gihangyo niya ang katawhan nga di magpadala sa mga rebelde sanglit delikado kaayo kun mag-abot ang ilang pwersa.
Ang nahitabong binakbakay niadtong higayona maoy labing una karon nga tuig dinhi sa lalawigan. (Orlando B. Dinoy)