GIPASAKA na sa kapulisan ang kasong paglapas sa Republic Act 9165 kun Dangerous Drgus Act of 2002 ug illegal possession of firearms batok sa duha ka mga drug pushers ang nasikop sa kapulisan atol sa buy bust niadtong Martes didto sa Purok 15, Sanasa, Barangay Bucana, siyudad sa Davao.

Ang kaso nakadoket sa IS # XI-02-INQ-10-A-00069 ug IS # XI-02-INQ-10-A-00068 didto sa City Prosecution Office (CPO), Ecoland, siyudad sa Davao.

Gidemanda mao sila Virgilio Tibug, alyas Ambing, 30, minyo, nagpuyo sa Purok 15, Sanasa ug Jose Malinao, 27, ulitawo, nagpuyo Purok 13, Belusa, Barangay Bucana.

Ang duha nakuhaan sa mga pulis og gidiling druga, armas ug mga bala sa nagkalain-laing kalibre sa pusil dihang gisikop sulod sa payag nga gipanag-iyahan ni Dodong Balanga.

Sila Tibug ug Malinao gisikop sa kapulisan sa Investigation Detection and Management Branch (IDMB) sa Davao City Police Office (DCPO) nga gipangulohan ni Police Superintendent Antonio Rivera.

Mga pulis naglusad og buy bust operationn human nasuta sa ilang surveillance operation nga ang duha namaligya og shabu didto sa maong lugar.

Usa ka nagtakubang pulis ang miduol sa nahimutangan sa mga suspetsado ug didto gitunol ang salapi nga bayad sa duha ka pakiteng shabu.

Human gitunol sa mga suspetsado ang shabu, giposasan dayon siya sa mga pulis ug gisakmit ang duha ka pakiteng shabu ug mga shabu paraphernalia.

Nakuha gikan kanila ang usa ka .45 shooters SAM 1911 Brand nga dunay serial number 09981000 nga dunay walo ka mga buhin bala.

Ang kapulisan nakasakmit sab og pito ka mga buhing bala sa .38 kalibre nga rebolber ug walo ka mga buhing bala sa 9mm nga pistola. (AD)