ANG tag-iya sa Banderas Security Agency ug laing duha ka tawo ang gipasakaan na og kasong illegal possession of firearms sa kapulisan sa City Prosecution Office (CPO) dinhi sa siyudad sa Davao.

Ang kaso gipasaka niadtong Huwebes human nasakmit ang 50 ka mga nagkalain-laing armas sulod sa usa ka balay didto sa No. 10, Eagle Street, GSIS Heights, Matina.

Gidemanda mao sila Mussolini Lidasan, tag-iya, Pike Luminda Esmael ug Sergeant Alberto Duhig sakop sa 67th Infantry Battalion sa Philippine Army.

Si Duhig gisikop sa kapulisan human napakyas siya sa pagpakita og dokumento nga siya gitugotan sa Commission on Elections (Comelec) nga siya mamahimong mohatag og security service sa maong security agency.

Ang tulo gidemanda pinaagi sa summary inquest procedure ug nakadoket ang kaso sa IS # XI-02-INQ-10-A-00070 gumikan sa paglapas Republic Act 8294 kun illegal possession of firearms.

Sila Lidasan, Esmael ug Duhig nasikop sa kapulisan dihang gironda ang balay niini pinaagi sa gahum sa search warrant number 1328 nga gipaguwa ni Judge Isaac Robillo Jr. sa Regional Trial Court (RTC) Branch 11.

Gisulod sa Special Task Group Against Private Armed Groups nga gipangulohan ni Superintendent Vicente Danao ang balay ni Lidasan sa alas 5:30 sa buntag niadtong Huwebes.

Nakuha kapulisan ang 24 ka .38 kalibre nga rebolber, 19 ka mga shotguns, duha ka .45 kalibre nga pistola, usa ka 380 nga pistola, tulo ka M16 rifle, usa ka M16 fragmentation granade, usa ka baton sword, 300 rounds sa mga bala sa M16 rifle.

Si Lidasan giingon nga igsuon ni Bai Farida Ampatuan, Bise Mayor sa Matanog, Maguindanao nga asawa ni Department of Energy Undersecretary Zamzamin Ampatuan nga ig-agaw sab ni Datu Andal Ampatuan Jr., suma ni Police Chief Inspector Joselito Loriza, station commander sa Talomo Police Station.

Si Lidasan nagsulti sa mga sakop sa media nga ang mga armas gipanag-iyahan sa iyang security agency ug dili kabahin sa gidudahang armas sa mga Ampatuan.

Nasuta sa kapulisan nga ang license to operate sa security agency mi-epire na niadtong Agosto 2008. (AD)