TULO ka mga tawo ang patay ug laing usa ang grabeng nasamdan sa labing uwahi nga masaker nga nahitabo sa probinsiya sa Maguindanao.
Ang kapulisan nag-ila sa mga hingkabsan sa kinabuhi nga sila si Abdullah Salibak, 40 anyos, iyang upat ka bulan nga buntis nga asawa nga si Rahima 37, ug ilang anak nga si Maimona, 17.
Samdan usab sa laing bahin, mao ang ilang paryente nga si Rajil Hampar, kinsa maoy nagmaneho sa motorsiklo ug pulos mga nagpuyo sa barangay Poblacion, Datu Saudi Ampatuan.
Sigun sa taho gikan sa Maguindanao Police Provincial Office nga banda alas 5:40 sa hapon, niadtong Enero 21, lulan ang mga biktima sa usa ka motorsiklo gikan sa ilang uma sa barangay Iginagampong, Datu Unsay, ug mipadung sa pauli sa ilang bay. Apan pag-abot nila sa barangay Salbo, Datu Saudi, girakrakan sila og pusil sa nag-atang nga wala mailhing mga armadong lalaki gamit ang M16 armalite rifle.
Namatay diha dayon ang mga biktima samtang ang drayber sa motorsiklo nga si Hampar nakahimo pa sa pagpadagan paingon sa luwas nga dapit ug bisan kun samdan nakapangayo pa og pakitabang ngadto sa mga sibilyan.
Dali sab nga misibat ang mga armado sa diha nga nakatimaho nga niresponde ang puwersa sa militar ug kapulisan.
Mga samaron nga biktima gidala dayon sa mga otoridad ngadto sa Cotabato Regional and Medical Center.
Nagtuo si Maguindanao Police Provincial Director Sr. Supt. Alex Linesses nga mga Private Armed Groups sa mga pulitiko ang mitipi sa mga biktima.
Hionuon, gisusi na karon sa kapulisan unsay tinuod nga motibo sa krimen.
Gibati ug kahadlok karon ang mga sibilyan sa Maguindanao kay bisan kun anaa pa sa state of emergency ang ilang dapit ug dunay ubay-ubay nga mga puwersa sa militar ug kapulisan, duna pa gihapoy mga tawo nga wa nahadlok sa paghimo og krimen.