Albor: Adunahan ang mga Bol-anon

NAGSALAG sa dughan sa Central Visayas ang Bohol nga dunay 47 ka lungsod ug siyudad sa Tagbilaran.

Gibahig sa tulo ka distrito.

Mapa daw ubi nga kinampay gitawag og God’s Little Paradise.

Gikan sa ngalang boho nga daghan kaniadto.

Dunay bersyon nga ginganlan og Bohol gikan sa Bool nga lugar sa hari nga si Datu Sikatuna nga sa 1565 didto ang blood compact o sandugo tali sa Katsila Miguel Lopez de Legaspi silbing treaty of friendship.

Misunod ang sandugo tali ni Legaspi ug hari sa Loboc nga si Datu Sigala.

Hinungdan nga dunay Sandugo festival matag Hunyo.

Ang Bohol kaniadto usa ka politikanhong kabahin sa Cebu ug nalain nga probinsya sa Hulyo 22, 1854 uban sa isla sa Siquijor.

Unang makasaysayanong rebolusyon sa 1561 nga ang nitibong pari nga si Tamblot nakiggubat sa mga Katsila.

Ika-duha si Francisco Dagohoy sa 1744-1829 ang kinatas-ang rebelyon sa sabakan sa kasaysayan.

Ika-tulo mao ang pagkapuhag sa mga Hapon sa World War 2 kay gipaluyohan kita sa Amerika nga nakatunol og kagawasan sa mga Bol-anon sa Abril 11, 1945.

Ikaupat dili na kontra ang mga Katsila ug Hapon kondili tali sa bandidong Abu Sayyaf ug tropa sa gobyerno sa Abril 2017.

Gawas sa gubat nahiagom ang Bohol sa 7.2 magnitude nga linog sa Okt. 15, 2013 ug supertyphoon Yolanda sa Nob. 8, 2013.

Bisan gitay-og sa mga katalagman nagpabiling adunahan sa mga bahandi sa kinaiyahan ug gitugkan sa kalamboan nga gihugpaan sa mga turista.

Ang 1,001 ka mga bungtod mao ang naglaray nga Chocolate Hills sa Sagbayan ug Carmen nga talagsaon ang maong geological wonder.

Gibilohan sa mga matahom nga talan-awon, nabantog nga puting balas sa kabaybayonan, scuba diving, adunahan ang kadagatan, mabulokon ug berding kalasangan, talagsaong kinhason sama sa gloria maris ug golden cowry, pinuy-anan sa mga tarsier ug ihalas nga mga mananap ang Loboc, waterfalls, bahandianong langub, historical landmarks, karaang mga simbahan, nabantog nga kalamay, peanut kissess ug ubang pagkaon.

Matahom nga suroyanan ang Loboc Floating restaurant ug Echo Park, Chap biking ug 360 sa Carmen, Bilar Butterfly Garden, Danao Sea of Clouds, Adventure Park ug River Boating, Sagbayan Peak, Anda Beach, Cadapdapan Rice Terraces, Ubay Echo Park, Candijay falls, Jagoliao Mangrooves Farm sa Getafe, Sipatan Twin Hanging bridge sa Ewon, Sevilla; Jardin Necitas-Glowing Garden sa Bagumbayan, Pilar ug Panglao beaches.

Gideklarar ang Panglao Island nga maoy unang tourism state sa nasod. Ang Loon maoy pinuy-anan sa ika-upat nga presidente sa republika nga si Carlos P. Garcia sa 1957-1960.

(csa_1156@yahoo.com/0916-734-5737)

Related Stories

No stories found.
SunStar Publishing Inc.
www.sunstar.com.ph