Binghay: Dag-om nga kaugmaon

TAUD-TAUD na nga nag-segi og date silang Cory ug Mario (tinuod nga mga pangalan gitago) apan hangtod karon, kon pangutan-on, way klaro ilang relasyon, fling-fling ra ba o uyab na?

Naglibog ug naglisod og tubag si Cory ini nga pangutana kay taas- taas na sab ang panahon nga iyang nahatag ug gisakripisyo para sa iyang ‘future nga forever’. Gawas pa sab, 40 na siya kapin og maihap na lang ang mga lalaki nga naninguha niya.

Gisaysay niya ang tanan diri nako. Human, nanglumoy kay gisakitan pag-ingon nako nga angay na niyang buhian si Mario.

Ngano? Kini nga mga rason maoy nakapa-ingon nako nga naghinangat ang dag-om kon kini iyang ipadayon kay way kapa-ingnan ilang relasyon.

Una, Si Mario mismo way klaro sa ilang sitwasyon. Panahon nga iya kining pangutan-on, dayon kini og lihay sa estorya unya katawa nga di man unta kataw-anan.

Gawas ini, naka ingon sab ko nga one-way ra ang ilang relasyon kay wa man silay kumon nga gustong buhaton gikan sa salida nga tan-awon, pagkaon, lugar nga suroyan, simbahan nga ampo-an, sinena nga isul-ob ug upan ba. Kanunay, ang kang Mario ang pirming matuman unya ang iya, ipadaplin. Wa kini konsiderasyon sa iyang pagbati ug gusto.

Sa mata sa ka-ila nila, dili sab sila bagay sa usag-usa kay kusog molihay si Mario panahon nga gustong makighimamat ug makig-kukabildo ang iyang pamilya ug suod nga mga higala. Di sab kini makisama sa mga kaparintihan.

Ang batasan di sab makaon. Dihay higayon nga nagbinastos kini og pangasaba sa waitress dihang nadugay og hatod ilang order. Dali rang misipok ang ulo ini dayon walk-out. Ang ending, si Cory nga maoy nahabilin ug na-uwawan mao hinuoy nakatapal.

Human naladlad ang tanang baraha, nakamata si Cory sa iyang sitwasyon. Bisan tuod og iyang napasaylo si Mario sa mga hiwing binuhatan ug ngil-ad nga batasan, wa na kini mokuyog pag-usab sa sunod nga imbitasyon.

Mas bali pang magsugod sa uno sa bag-ong kaplag kaysa magpabiling buta ug bungol sa way klarong relasyon ug dag-om nga kaugmaon.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph