USA ka Japanese national gikawatan og cellphone sa wa mailhing tulisan nga nagsakay og habalhabal sa F. Gochan Street, Mabolo, dakbayan sa Sugbo, pasado ala 1:00 sa kaadlawon niadtong Huwebes.
Giila ang maong biktima nga si Midori Shimada, kasamtangang nagpuyo sa Salinas Drive, Lahug, dakbayan sa Sugbo.
Nakuha sa usa ka wa mailhing tulisan ang usa ka cellphone unit nga iPhone 6S nga nagkantidad og P40,000.
Sigon sa impormasyon nga giasoy sa biktima sa kapolisan, didto sa A.S. Fortuna Street, dakbayan sa Mandaue nisakay ang maong biktima og habalhabal ug nagpahatod sa padulong sa Sarosa Hotel.
Apan pag-abot nila sa F. Gochan St., ang drayber nideklarar og tulis ug gigapos ang biktima, gikuha ang cellphone niini ug ubang mahalong butang.
Nisukol ang biktima apan nahagba sila ug ang biktima nakatagamtam og sakit sa bun-og sa iyang lawas.
Ang suspek daling niikyas padulong sa sentro sa dakbayan Mandaue sakay sa samang motorsiklo ug gibiyaan ang kutsilyo ug helmet niini sa dapit.
Sa pagkakaron, ang maong kaso gisubay sa kapulisan ug ang drayber sa habalhabal gipangita. (Lloyd Earl Sabequil, CNU Comm. Intern)