HELLO! Kumusta po?
Init tuod dala ulan panagsa ang panahon apan dili kini angayang makadaut sa "mood" nato, igsuon. Oh, ayaw palisngaga ang imong ilong kay ang atong kinabuhi wala nakadepende sa lakat sa panahon. Kiyod... este kayod gihapon daily bisan gani ang gabii himuong adlaw apil pangalot sa opaw.
Condolence diay sa pamilyang Denora dinhi sa syudad sa Panabo. Intawon gi-ambush niadtong Huwebes ning kasamtangang bulan ug tuig, ang atong amigo nga si Dennis Denora, publisher sa Trends & Times nga mantalaan ug nagasibya pod sa kahanginan.
Daghan man kita og mga plano sa kinabuhi apan kung "oras" na nato nga mahanaw ning kalibutan - wala gayud bisan kinsa ug unsa ang makapugong niini. Bantay ning mga progresibong grupo kay basi'g gamiton na
pod kining isyu batok sa atong Pangulo.
Paghulat mo sa imbestigasyon ug ayaw mo pagdugag kahasul sa pamilya ug sa atong nasud - klaro bah!
Anyway, ang pulong nga, "certain" mao ang mga “klarong” matang nga nagapanghitabo sa kalibutan sama sa pagsubang ug pagsalop sa adlaw. Uncertain ang tawag sa mga “way klaro (apil kaha ka, migo?) sama sa mga presyo sa palaliton nga morag spaghetting pataas ng pataas nga unta moubos na pod.
Adlaw adlaw kitang nag-atubang sa mga butang nga duna ug walay kasegurohan. Angay ba kining kahadlokan? Kulba god kung hunahunaon apan natural na kini nga mga kabahin sa kinabuhi nato, igsuon.
Ang kinabuhi daw lima-singko sa kabarato kay wala pa gayud ko nakabalita nga walay gipatay nga tawo matag-adlaw sa tv ug radyo... apil diay sa peryodiko walay labot ang “radyo-baktas” nga silingan (chismosa) namo.
Nan, unsa na man ang saligan ug kinsa man ang mopanalipod nato, atong hinagiban (kung naa), atong kusog sa kalawasan, kaanyag, ka-brayt o kadatu? Ang Bibliya nagkanayon nga ang kalangitan ug kalibutan mahanaw
apan dili ang Akong Pulong (Lukas 21:33).
Kung mahanaw man lamang kining tanan nganong andam man kitang makigpatay o mamatay og tumang tinarbaho aron maangkon ang mga ginahinaman nato? Tubaga ko mga silingan. Ang atong kinabuhi wala ba nausikan sa mga matang nga ato karong ginapaningkamotan?
Nag-abroad pa gani ang uban aron maharuhay pero ang resulta, nabungkag hinuon ang pamilya. Ang uban biktima sa krimen o nadisgrasya mao wala nay pulos ang pagpaningkamot nila.
Anugon kaayo kung usikan nato ang panahon sa mga walay klarong butang, igsuon apan wala man pod ni usa kanato ang nasayod sa umaabot, di ba? Gituyo gayud ni sa Ginoo bah aron makatuon kita og pangita, sangpit ug pagtuo Kaniya. Dili masaligan ang atong kakayahan kay temporaryo ra ang tanan.
Ang panahon kuno mora'g kwarta, igsuon. Ang kagahapon, nagasto na. Ang future kon “umaabot” wala pa sa atoa. Ang karon, mao kini ang “cash on hand” nga mamahimo natong gastuhon. Ang pangutana, asa nato itagana ang panahon nga gigrasya sa Ginoo sa atoa? Ugma puhon basig mo “expire” na kita so, atong pasalamatan ang karon ug paningkamotan nga magasto sa pagbuhat og mga maayuhon. Uyon?