JOSE ABAD SANTOS, Davao Occidental -- Pipila ka oras lamang una miabot si Davao City Mayor Sara Duterte-Carpio sa Davao Occidental niadtong Biyernes sa buntag, natigayon ang giyera sa kasundalohan tali rebelde’ng New People's Army (NPA) sa Sitio Lambuto, Barangay Culaman.
Sa impormasyon gikan sa Police Regional Office (PRO)-Davao Region, nasayran nga natigayon ang tunga sa oras nga sinukliay og bala sa 73rd Infantry Battalion tali 20 ka mga sakop sa rebelde.
Walay nasamdan sa bahin sa militar samtang usa ka patay nga lawas ang narekober nga gituohang miyembro sa NPA nga giilang si Marmar Talino Cawan, alyas Budok, giingong political instructor sa NPA sa Platoon North, ubos sa Guerilla Front 71 ug nagpuyo sa Sitio Upper Kihan, Barangay Upper Suyan, Malungon Sarangani Province.
Nakuha sa militar sa nahitaboan ang mga personal nga gamit ug mga sobersibong mga dokumento nga iya sa NPA.
Dunay 102 kilometro gikan sa Jose Abad Santos ngadto sa Malita diin asa si Mayor Sara ang nahimong kabahin sa groundbreaking ceremony sa P3-billion Davao Occidental Provincial Capitol Complex ug Government Business Center sa Barangay Lais.
Una niini, sa Davao City si Mayor Sara mihatag og localized peace talks ngadto sa mga NPA sa Davao City ug sa Davao Region human gibasura sa Duterte administration ang peace talks tali GRP-panels ug sa CCP-NPA-NDF.